© European External Action Service
Afracaigh agus Eorpaigh Óga ag cur tionscadail nuálacha ar bun ar bhonn píolótach
An nuashonrú is déanaí an An Mháirt, 29/09/2020
Seoladh an Lárionad um Chomhar Óige AA-AE i mí Dheireadh Fómhair 2018 agus tógann sé le chéile 42 shaineolaí óga ón Afraic agus ón Eoraip. Tá tionscadail nuálacha phíolótacha á bhforbairt acu agus tá faireachán á dhéanamh acu orthu, ar tionscadail iad a chuir an tsochaí shibhialta chun feidhme ar an dá mhór-roinn.
Is tionscnamh nuálach a bhfuil baint ag an iliomad páirtithe leasmhara leis é an Lárionad um Chomhar Óige AA-AE. Leis an tionscadal, tugtar le chéile 42 dhuine óga de bhunús 28 dtír dhifriúla. Is as an Afraic agus an Eoraip nó is cuid den diaspóra iad na daoine sin, ar saineolaithe iad i raon leathan réimsí éagsúla, an cultúr, an rialachas, an fhiontraíocht agus an t-athrú aeráide ina measc? Thar aon rud eile, tá dúspéis acu sa chomhar idirnáisiúnta. Cén cúram atá orthu? Is é an cúram atá orthu smaointe a thiontú ina dtionscadail phíolótacha atá le cur chun feidhme ag an tsochaí shibhialta ar an dá mhór-roinn.
Is cuid de Raon Óige AA-AE é an Lárionad um Chomhar Óige AA-AE. Tháinig ann aon Lárionad tar éis an cúigiú Cruinniú Mullaigh AA-AE in Abidjan in 2017. Tá sé d'aidhm aige cuimsiú na ndaoine óga ón Afraic, ón Aontas agus ón diaspóra a neartú sa Chomhpháirtíocht AE-an Afraic agus sa chomhar AA-AE. Sa chomhthéacs sin, tá an Lárionad ar aon dul leis an gceathrú Cruinniú Mullaigh AE-an Afraic don Óige, cruinniú as a d'eascair Dearbhú Óige Abidjan, agus Tionscnamh Mol an Óige AA-AE
Cur chuige úrnua
Bhuail daoine óga an Lárionaid le chéile den chéad uair in Addis Ababa na hAetóipe i mí Dheireadh Fómhair 2018. Ón uair sin i leith, bhuail siad le chéile ar líne nó duine le duine ag cruinnithe mullaigh nó ag imeachtaí, cuir i gcás Fóram Síochána Pháras. Mar a tharlaíonn sé, roghnaíodh an tionscadal ar cheann de na 10 dtionscnamh rialachais is fearr ag an gcéad Fhóram riamh i mí na Samhna 2018.
“Is tionscadal go huile is go hiomlán nua a bhfuil cur chuige úrnua aige, tionscadal a chruthaigh an óige agus a chuireann siad chun feidhme ar maithe leis an óige,” a mhínigh Elena Bonell De Pascual, ar rannpháirtí ón Spáinn í agus a oibríonn mar chomhairleoir measúnaithe tionchair le roinnt cuideachtaí san Afraic agus san India.
Is é atá eiseamláireach faoin Lárionad go dtéann sé níos faide ná na gnáthbhealaí a úsáidtear chun rannpháirtíocht daoine óga a spreagadh, arb iad comhairliúcháin atá go minic teoranta do mholtaí agus ionchur beartais a chur ar fáil. Téann an Lárionad níos faide ar aghaidh agus baineann sé triail as rannpháirtíocht saineolaithe óga a spreagadh i ngach céim den phróiseas forbartha tionscadail – ón múnlú ag an tús, go dtí an próiseas roghnúcháin agus ar aghaidh go dtí an próiseas faireacháin.
Réiteach chun tairbhe do chách
Ba é a cuireadh roimh shaineolaithe óga an Lárionaid tionscadail nuálacha atá an-phraiticiúil a fhréamhshamhaltú in éineacht leis na heagraíochtaí sochaí sibhialta a chuirfidh chun feidhme iad, eagraíochtaí a roghnaíodh trí ghlao ar thograí. Tá siad roinnte ina sé foghrúpa, is iad sin: “Cultúr, na hEalaíona agus Spórt”; “Oideachas agus Scileanna”; “An Comhshaol agus an tAthrú Aeráide”; “Gnó, Cruthú Post agus Fiontraíocht”; “Rialachas agus Cuimsiú Polaitiúil”; agus “An tSíocháin agus An tSlándáil”. Is foghrúpa trasghearrthach é an seachtú foghrúpa, “An saol digiteach”, agus cuireann sé tacaíocht theicniúil ar fáil do na sé fhoghrúpa eile. Cuireadh ar bun é le déanaí agus tá baill nua á n-earcú ag an Lárionad faoi láthair – mar sin, déan iarratas roimh an 6 Márta ar 7:00pm (Am Lár na hEorpa)!
Is fiú €10 milliún san iomlán na tionscadail. Cuirfear ar bun iad ar bhonn píolótach ach mar chuid díobh, díreofar ar an tionchar agus an infheictheacht is mó chomh maith le torthaí soiléire. Anuas ar an Afraic agus an tAontas a thabhairt níos giorra dá chéile, ní mór an fhéidearthacht a bheith ann na tionscadail a chur ar bun ar scála níos mó agus an athuair.
“Is eispéireas é atá chun tairbhe mhuintir na hEorpa agus mhuintir na hAfraice araon", a dúirt an rannpháirtí Komi Elon Claude Sodokin, ar saineolaí comhshaoil agus ball de dhiaspóra na hAfraice sa Spáinn é. Mar chlabhsúr, dúirt sé gur réiteach chun tairbhe do chách é an Lárionad.