Féile Oilimpeach Óige na hEorpa: cluichí beaga Oilimpeacha do réalta móra na todhchaí

An nuashonrú is déanaí an An Chéadaoin, 10/07/2024

Tá Féile Oilimpeach Óige na hEorpa ar cheann de na mórimeachtaí do lúthchleasaithe óga as an Eoraip atá ag iarraidh dul san iomaíocht go hidirnáisiúnta.

Is é Féile Oilimpeach Óige na hEorpa, a seoladh in 1990, an chéad mhór-imeacht ilspóirt san Eoraip atá dírithe ar lúthchleasaithe óga ar thionscnamh Chumann Choistí Oilimpeacha na hEorpa. Bíonn imeacht geimhridh agus imeacht samhraidh ann, a reáchtáiltear i dtimthriallta dhá bhliain, sna blianta corruimhreach.

Cad atá i gceist leis?

Múineann an Fhéile na luachanna agus na hidéil atá mar chuid de na prionsabail i gCairt Oilimpeach Pierre de Coubertin. Mar chuid den Idéal Oilimpeach, cuidíonn an Fhéile chun comhthuiscint a chruthú gan aon chineál idirdhealaithe agus cothaítear cairdeas, cothrom na Féinne agus caoinfhulaingt. San am céanna spreagtar tuilleadh ógánach le spórt a chleachtadh agus lena saol a chaitheamh go sláintiúil.

“Is ócáid den scoth í Féile Oilimpeach Óige na hEorpa chun múineadh do lúthchleasaithe óga ar fud na hEorpa an tábhacht atá le hidéil ar nós na hiomaíochta cóir, an ómóis, na caoinfhulaingthe agus an chairdis.”
Jean-Michel Saive

A bhuí leis an bhFéile tugtar daoine óga as suas le 50 tír as an Eoraip le chéile i Sráidbhaile Lúthchleasaí amháin, agus feabhsaítear an comhtháthú Eorpach dá bhrí sin. Is geata í an Fhéile freisin chuig na Cluichí Oilimpeacha; d’éirigh le go leor acu siúd a bhuaigh bonn ag an bhFéile boinn a bhuachan freisin ag na Cluichí Oilimpeacha, agus is ann a fhaigheann lúthchleasaithe óga an chéad bhlaiseadh ar ócáid Oilimpeach agus a bhfuil i gceist léi.

Cé atá in ann a bheith páirteach?

Bíonn Féilte Oilimpeacha Samhraidh agus Geimhridh na hEorpa dírithe ar lúthchleasaithe óga as gach cearn den Eoraip. Is féidir le lúthchleasaithe idir 14 agus 18 mbliana d’aois páirt a ghlacadh iontu ach ainmniúchán a fháil óna gCoiste Náisiúnta Oilimpeach. Is ball de Choistí Oilimpeacha na hEorpa é an Coiste Náisiúnta sin. Téann thart ar 3,600 rannpháirtí chuig féilte an tsamhraidh, agus bíonn thart ar 1,600 rannpháirtí i gceist le linn an gheimhridh.
Is cuma mura lúthchleasaí thú, féadfaidh tú a bheith páirteach san Fhéile ach oibriú go deonach ag ceann de na Féilte. Is deis iontach é chun taithí a fháil ar ócáid mhór a eagrú, agus ar an dóigh sin scileanna infhostaithe a fhorbairt agus bualadh le daoine as tíortha eile ar fud na hEorpa.

Cad a tharlaíonn i rith na Féile?

Bíonn leagan amach na Féile mar an gcéanna le leagan amach na gCluichí Oilimpeacha: bíonn searmanais oscailte agus clabhsúir araon ann, coinnítear an lasair Oilimpeach lasta i rith na féile ar fad, seinntear an t-amhrán náisiúnta in ómós an bhuaiteora, agus ardaítear bratacha gach uile dhuine a bhuann boinn.
Bíonn deich spórt Oilimpeacha ar siúl ag Féile an Gheimhridh: sciáil Alpach, dé-atlan, sciáil trastíre, curláil, scátáil fhíorach, haca oighir, scátáil ghearr-raon, léim-sciáil, clársciáil agus sciáil Nordach dhá chomórtas. Bíonn 11 spórt ar siúl ag Féile an tSamhraidh: gleacaíocht ealaíonta, lúthchleasaíocht, cispheil, rothaíocht, ráib chanú, liathróid láimhe, júdó, snámh, leadóg, eitpheil agus iomrascáil.