Германскиот град Хамбург нуди многу работи за да се направат и истражат, што го прави совршена станица на твоето DiscoverEU патување. Прекрасната архитектура, бреговите на реката Елба, парковите и многубројните уникатни музеи, го прават ова место возбудливо за да поминете еден ден во разгледување. Хамбург е широко признат како најиновативниот паметен град во Германија, кој е на врвот во двете рангирања на Битком и Хаселхорт Асошиејтс за 2020 година. Хамбург го тестира потенцијалот за автономното возење во Европа. Затоа, качи се на автономниот минибус и доживеј ја можноста да се возиш низ градот без возач! Продолжи да го истражуваш напредокот во областа на урбаните и дигиталните иновации и посети го Хамербруклин.Дигиталкампус.

Дали бараш романтична дестинација? Качи се на воз и посети го германскиот град Хајделберг. Неговите замокни рушевини, убави куќи, калдрмени улици, бујни ридови, древни плоштади и прекрасни глетки на реката, го прават да изгледа како да е од сликовница. Пронајди малку мир и доживеј неверојатни глетки кон градот одејќи по филозофската патека. Хајделберг се стреми да биде динамичен, иновативен и меѓународен град, кој користи паметна дигитална технологија за да понуди висок квалитет на живот за сите свои заедници и да го заштити уникатниот карактер на градот. Градот бил пионер во многу области, почнувајќи од медицината и образованието. За да го искористиш максимално твојот престој во Хајделберг, преземи ја градската апликација. 

Улм, кој се наоѓа на брегот на реката Дунав во Германија, е многу повеќе од родното место на Алберт Ајнштајн и највисоката црковна кула во светот! Додека го разгледуваш овој скромен град, со сигурност ќе откриеш изобилие на култура, зачудувачка архитектура и прекрасни изненадувања. Додека се шеташ по калдрмените улици, застани кај Ратхаус Улм и разгледај ги нејзините исклучителните фрески од средината на 16 век. Точно пред неа се наоѓа и Фишкастенбрунен (Фонтана со кутија за риби). Таа го добила името од трговците со риба кои ја користеле за да ја одржуваат својата риба жива за време на пазарните денови. Улм е носител на титулите Град на иднината 2030 и Дигитална општина на иднината во рамките на германската сојузна покраина Баден-Виртемберг. Градот исто така се фокусира на промовирање на иновации во бизнисот благодарение на својот технолошки инкубатор, Вершворхаус.

Главниот град на една од најмалите земји во светот, Вадуз има многу што да понуди и покрај своите мали размери. Во градот има многу инспиративни музеи, вклучувајќи го Музејот на ликовна уметност на Лихтенштајн, кој прикажува инспиративна колекција на современа и модерна уметност. Можеш слободно да се прошеташ низ прекрасниот центар на градот во кој нема автомобили и да ги рагледаш зачуваните средновековни, готски и барокни градби. Од центарот на градот, можеш да продолжиш по патеката со лесна падина, која води до прекрасниот замок Вадуз, кој е дом на принцот од Лихтенштајн. Покрај тоа што е паметен, поврзан град, Вадуз е и центар на дигитални бизниси. Градот е дом на иницијативи како Дигитален Лихтенштајн, кој има за цел да ги сврзува, потпомага и развива дигиталните претпријатија и на Дигиталниот самит на Лихтенштајн.

Немој да бидеш во заблуда, Милано не е само за мода! Од историја, уметност и шопинг до добра храна и спорт, главниот град на Ломбардија нуди многу. Некои од неговите атракции кои не смеат да се пропуштат се запрепастувачката катедрала Ил Дуомо, соседната Галерија Виторио Емануел II и волшебните канали на областа Навигли со неговите динамични барови. Додека си таму, зошто да не ја разгледаш и инспиративната градска улична уметност? Ќе имаш пристап до бесплатен WiFi во Милано благодарение на повеќе од 50 бесплатни WiFi точки низ градот. Нема сомнеж дека Милано ќе ти се допадне! Во 2019 година, градот ја освои наградата на Њу Ситис Велбиинг Сити за паметни градови. Милано придонесе за проектот на Европската унија за паметен град EУ-ГУГЛЕ, кој развива модели за реновирање на згради со речиси нулта употреба на енергија, за воведување низ цела Европа. Градот, исто така, работи напорно за да ја зголеми достапноста на својата мрежа на јавен превоз, работејќи со организации за лицата со попреченост за развивање на стандарди за пристапност до јавниот превоз. Оваа и други иницијативи му го донесоа на Милано првото место за наградата “Пристапен град“ во 2016 година. 

Во Риека има многу работи што можат да го привлечат љубопитниот посетител, па имни се од возот и откриј го хрватскиот град! Додека си во Риека, прошетај по Корзото. Главната патека, која се протега паралелно со бреговите на Рива, е пријатна, пешачка линија со тераси на кафулиња и продавници. Ќе те одведе до класичните фасади на зградата на Радио Риека и градската кула со часовник. Осигурај се дека нема да пропуштиш да го видиш Тунел-Ри, подземниот тунел. Благодарение на проектот WiFi4EU – проектот од 2019 фодина, за бесплатен WiFi интернет за Европјаните, достапен е бесплатен WiFi со големи брзини, во некои делови од градот. Во 2018 година, Риека била наградена како победник во категоријата Најдобар паметен град во Хрватска. Сега градот е ангажиран на 83 проекти за паметни градови кои моментално се во тек. 

Време е да се качиш на возот и да станеш зелен! Застани во Ново Место во Словенија. Неговата врска со природата силно влијаела на историјата на градот. Од идиличниот замок Оточец на средината на островот во реката Крка до ридовите на Тршка Гора, населени со лозја и колиби, Ново Место нуди неверојатни откритија. Не пропуштај да го видиш Брег, за да ги погледнеш овие историски улици. Ако си уморен/на од пешачење, качи се на електричен автобус кој неодамна е пуштен во употреба во градот. Ново Место има за цел да стане паметен град до 2030 година. Градот работи заедно со Телеком Словеније и САП Словенија за развој и инсталирање на инфраструктура за паметен град низ целиот град.