Le cúrsa Máistreachta atá á mhaoiniú ag an Aontas, cuirtear gníomhaithe um chearta an duine ar an mbóthar ceart

An nuashonrú is déanaí an An Mháirt, 29/09/2020

Ar mhaith leat an dúil atá agat i gcearta an duine a thiontú ina gairm a dhéanfaidh difríocht? Le cúrsa Máistreachta atá á mhaoiniú ag an Aontas, cuirtear teagasc den chéad scoth, turais staidéir idirnáisiúnta agus tacaíocht iar-chéime ar fáil chun an post idéalach sin atá uait a aimsiú.

Féach an físeán seo le feiceáil céard atá le rá ag alumni an chláir.

Is líonra idirnáisiúnta de 100 ollscoil é an Campas Domhanda um Chearta an Duine. Faigheann sé maoiniú ón Aontas agus is lárionad comhordúcháin é le haghaidh saineolaithe um chearta an duine agus acmhainní ó gach cearn den domhan. Is é an Clár Máistreachta Eorpaí um Chearta an Duine agus um an Daonlathú an príomhchlár teagaisc dá chuid, clár a bunaíodh in 1997, rud a fhágann gurb é an clár Máistreachta is faide ar an bhfód a fhaigheann maoiniú ón Aontas.

Gach bliain, tugtar deis do na 15 chéimí a bhfuil na marcanna is fearr acu intéirneacht le pá a dhéanamh leis na Náisiúin Aontaithe agus leis an Aontas, mar shampla. Is as an bhFrainc do Moana Genevey agus tá sí 27 mbliana d'aois. Ghlac sí páirt i gceann de na hintéirneachtaí sin i dToscaireacht de chuid an Aontais Eorpaigh chuig na Náisiúin Aontaithe i Nua Eabhrac tar éis di a céim a bhaint amach in 2015.

“Taithí ghairmiúil iontach a bhí ann,” a dúirt Moana. “Chaith mé cúig mhí ann agus fuair mé tuiscint dhomhain ar an gcaoi a bhfeidhmíonn na Náisiúin Aontaithe agus an tAontas araon, agus bhí cónaí orm i gcathair bhríomhar leis.”
Tá post faighte ag naonúr as gach deichniúr céimithe le heagraíochtaí stáit ábhartha, le heagraíochtaí idirnáisiúnta, le hinstitiúidí idirnáisiúnta agus le ENRanna idirnáisiúnta, le cuideachtaí príobháideacha nó sa saol acadúil. Is mian leis an gclár leanúint ar aghaidh ag tabhairt tacaíocht do mhic léinn tar éis dóibh a gcéim a bhaint amach. Cuireann Cumann EMAlumni tacaíocht ar fáil le haghaidh tionscadail a bheidh ann amach anseo agus le haghaidh forbairt ghairmiúil. 

Scileanna nua i suíomh sóisialta

Is cúrsa bliana é ina múintear meascán de theoiric agus de scileanna praiticiúla. Cuireann sé oideachas ar 100 mac léinn as an Aontas agus níos faide i gcéin gach bliain agus tá turas staidéir mar chuid de, rud a thugann deis do na rannpháirtithe tuiscint dhomhain a fháil ar na topaicí is fearr leo i gcomhthéacs réalaíoch, cuir i gcás an daonlathas agus an dlí.

Is as an Ungáir do Emoke Bebiak agus tá sí 31 bhliain d’aois. Is é a thaitin go mór léi faoin gcúrsa an ghné shóisialta agus éagsúlacht na mac léinn. 
“Is é an rud a bhain siar asam an méid eolais a d’fhoghlaim mé ó mo chomh-mhic léinn,” a dúirt sí. 
Is minic a roinn Emoke a cuid taithí agus í ag ithe dinnéir nó amuigh ar shiúlóidí lena comhghleacaithe as gach cearn den domhan. Faoi láthair, tá sí ag obair i nGinéiv na hEilvéise leis an bhFondúireacht Right Livelihood.

“An éagsúlacht, sin an rud is mó a thaitin liom,” a dúirt Danaé Coquelet as an mBeilg. “Thóg sé daoine le chéile as gach cearn den domhan, daoine a rinne staidéar i réimsí difriúla.”
Tá Danaé 27 mbliana d'aois anois agus le linn a dara seimeastar, d’fhoghlaim sí faoin imirce agus faoi chomhthéacs an Mheánoirthir in Ollscoil Naomh Iósaf i mBéiriút. Faoi láthair, tá sí ag obair mar attaché do chlár na Beilge um athlonnú dídeanaithe.

“Chuidigh mo staidéar EMA agus mo thaighde allamuigh sa Liobáin liom an saineolas a bhí uaim a fháil,” a dúirt sí.
Tá an clár oscailte do dhuine ar bith a bhfuil céim bainte amach aige i gceann de na réimsí ábhartha, cuir i gcás sa dlí agus sna heolaíochtaí sóisialta. Tá sé chúrsa cleamhnaithe Máistreachta ann freisin a dhíríonn ar réigiúin shonracha. Cuirtear eolas ar fáil ar shuíomh gréasáin an Champais Dhomhanda um Chearta an Duine maidir le cén uair a chuirtear tús leis an bpróiseas iarratais le linn na bliana agus conas is féidir leat iarratas a dhéanamh.