© Headway - Unsplash
Negozjar tas-salarju: Fejn jenħtieġ li nibda?
L-aħħar aġġornament sar fi It-Tlieta, 24/08/2021
Matul il-karriera tiegħek, jista’ jkollok opportunità li tinnegozja s-salarju tiegħek. Dan mhux kompitu faċli. Tmur għal salarju għoli u tirriskja li dak li jkun joffendi ruħu? Jew tmur għal salarju baxx u tirriskja li tnaqqas il-valur tal-ħiliet tiegħek? F’dan l-artiklu, aħna noffru xi suġġerimenti biex ngħinuk tibda.
Agħmel ir-riċerka tiegħek
Trid tmur tinnegozja b’ċifra tas-salarju – jew medda tas-salarju – ċara f’moħħok sabiex ikollok punt ta’ tluq tajjeb biex tibni fuqu. Iżda huwa importanti li tkun ċert li din iċ-ċifra tkun waħda realistika għax inkella jaf li n-negozjar ma jmurx kif kont qed tittama. Ir-riċerka ta’ pożizzjonijiet simili għal tiegħek, u ta’ salarji relatati hija mod tajjeb ħafna kif tikseb stampa ċara ta’ dak li jeħtieġ li timmira għalih u tagħtik pożizzjoni ta’ negozjar globali aktar b’saħħitha.
Kun af xi ssarraf
Jista’ jkun li int tajjeb biex tbigħ. Jista’ jkun li int tajjeb biex tittajpja 70 kelma fil-minuta. Jista’ jkun li kapaċi taqbad kunċett u tittrasformah f’xi ħaġa tal-għaġeb. Huma x’inhuma l-ħiliet tiegħek, jagħmluk ta’ valur għal kwalunkwe kumpanija. Huma jaġixxu wkoll ta’ punti ta’ negozjar tajbin ħafna. Għalhekk kun żgur li tqishom meta tkun qed tipprepara l-każ tiegħek.
Ħalli lill-impjegatur jagħmel l-ewwel pass
Bħalek, l-impjegatur aktarx se jkollu ċifra għas-salarju ċara f’moħħu. Filwaqt li jista’ jkun li tkun simili għal tiegħek, jaf tkun ukoll pjuttost differenti. Li tħallihom jagħmlu l-ewwel pass u jiżvelaw iċ-ċifra huma l-ewwel, jippermettilek tara kemm huma qrib l-aspettattivi tiegħek u tagħtik l-opportunità taġġusta ċ-ċifra tiegħek jekk tkun tixtieq dan.
Żomm ruħek impersonali
Dak li naqilgħu jista’ jkollu impatt kbir fuq ħafna oqsma minn ħajjitna, u dan jista’ jagħmel in-negozjar tas-salarju esperjenza personali ħafna. Filwaqt li dan wieħed jista’ jifhmu, huwa importanti li tipprova ma tinvolvix ruħek emozzjonalment kemm jista’ jkun. Li tibqa’ kalm/a u rilassat/a jgħinek tippreżenta dehra professjonali li probabbilment tappella għall-impjegaturi tiegħek. Jekk temozzjona ruħek, min-naħa l-oħra, tista’ taljena lill-impjegatur u ddgħajjef in-negozjar tiegħek.
Ħu l-ħin tiegħek
In-negozjar tas-salarju jista’ jkun proċess anzjuż u stressanti, u għalhekk jaf tiġi it-tentazzjoni li tipprova tħaffef biex tlesti minnu malajr kemm jista’ jkun. Irreżisti din it-tentazzjoni! Ħu l-ħin tiegħek u kun żgur li tkopri dawk il-punti kollha li huma importanti għalik. L-aħħar ħaġa li trid huwa li titlaq mill-proċess ta’ nnegozjar iddispjaċut.
Aħna nittamaw li dawn il-pariri jgħinuk tikseb is-salarju li tixtieq. Awguri fin-negozjati tiegħek!
Aqra aktar:
Kundizzjonijiet tax-xogħol u l-għajxien fil-pajjiżi tal-EURES
Id-database tal-Impjiegi tal-EURES
Is-servizzi tal-EURES għall-impjegaturi
Il-Kalendarju tal-Avvenimenti tal-EURES
Dikjarazzjoni ta’ ċaħda ta’ responsabbiltà: Jekk jogħġbok innota li la l-EURES u lanqas il-Kummissjoni Ewropea ma japprovaw kwalunkwe wieħed mis-siti web ta’ partijiet terzi msemmija hawn fuq.
L-artiklu sar fi sħubija mal-EURES, il-Portal Ewropew dwar il-Mobilità fix-Xogħol.