Is áit iontach é Cluj-Napoca le cuairt a thabhairt air. Tá cearnóga áille, sráideanna ceilte, caiféanna as an ngnáth agus siamsaíocht oíche bheoga le fáil ann. Tugadh aitheantas don chathair Rómánach mar Phríomhchathair Eorpach na hÓige 2015 agus mar an chéad chathair in Oirthear na hEorpa a bhain an chéim dheiridh amach i nGradam Phríomhchathair Nuálaíochta na hEorpa 2020. Tá líonra 18 mball the Wi-Fi ar fáil saor in aisce sa chathair a bheidh áisiúil chun roinnt aistriúcháin chúirtéiseacha a lorg nó do bhealach a dhéanamh i lár na cathrach. Agus tú in Cluj, glac roinnt ama chun do scíth a ligean i gcrandaí sa Pháirc Lárnach, tabhair cuairt ar Pháirc Eitneagrafaíochta Romulus Vuia chun níos mó a fhoghlaim faoi stair na Trasalváine, agus téigh i measc na mac léinn áitiúil i gceann de na tithe tábhairne beoga ar shráid Piezișă.
Is í Alba Iulia an chéad chathair chliste sa Rómáin. A bhuí leis an nuálaíocht, tá an chathair ag éirí níos inbhuanaithe. Laghdaigh Alba Iulia an fuinnimh a úsáidtear sa chathair cheana féin a bhuí le réitigh bainistithe soilsithe phoiblí. Agus tú ar cuairt ar an gcathair stairiúil seo, beidh tú in ann taitneamh a bhaint as Wi-Fi saor in aisce, mar tá os cionn 228 bpointe rochtana ann sa chathair féin agus 15 phointe rochtana ann sa chóras iompair phoiblí. Chun an chomhairle is fearr a fháil faoi ghníomhaíochtaí agus tú ann, íoslódáil an aip Visit Alba Iulia! Ná caill amach ar athrú an Gharda ag Dúnfort Alba Carolina, agus cuir aithne ar na dealbha agus tú ag siúl thart sa chathair. Tá an Dúnfort lán de dhealbha cré-umha d’áitritheoirí Alba Iulia agus iad i mbun a saol fada a chaitheamh. Mar sin, glac go leor grianghraf chun na cuimhní cinn a thabhairt leat!
Tá meascán uathúil ealaíne, ailtireachta agus eitneagrafaíochta le fáil in Craiova na Rómáine. Sin 3 chúis mhaithe cheana féin le stop a dhéanamh ann! Is iomaí foirgneamh a tógadh de réir stíl uathúil ailtireachta Brâncovenesc sa chathair seo ina bhfuil go leor foirgnimh mhaorga le feiceáil. Taispeánann an Músaem Ealaíne saothair bhreátha an dealbhóra Constantin Brâncuși. Agus tú in Craiova, déan cinnte nach gcailleann tú an Scairdeán Ceoil! Agus tabhair cuairt ar Pháirc Nicolae Romanescu le haghaidh siúlóid fhada in ósais ghlas na cathrach. Tá Craiova tiomanta éirí níos glaise mar chathair, agus tá réimse tionscnaimh chliste á gcur i bhfeidhm ann san am i láthair. Baineann an chathair leas as córais soilsithe LED cheana féin agus tá siad le leathnú faoi 2025.
Ar chuala tú trácht ar Vidin riamh? Is cinnte gur fiú stopadh sa bhaile calafoirt seo in Iarthuaisceart na Bulgáire mar a bhfuil go leor rudaí is díol spéise! Agus tú i Vidin, ná caill an daingean meánaoiseach agus ballaí Baba Vida. Thóg na Bulgáraigh an séadchomhartha seo idir an 10ú-13ú haois, agus tá sé ar cheann de na daingne Bulgáracha deireanacha slána atá fágtha. Sa lá atá inniu ann, tá an bardas ag leanúint d’aire a thabhairt dá fhoirgnimh agus tá sé tiomanta do thionscadal MAKING-CITY Horizon 2020 an Aontais. Is é is aidhm don tionscnamh sin an dóigh a léiriú le córais fuinnimh uirbigh a chlaochlú go héifeachtach ina gcathracha cliste ísealcharbóin. Is éard a bheidh i gceist leis foirgnimh chónaithe a iarfheistiú agus comhtháthú foinsí in-athnuaite fuinnimh a uasmhéadú in Vidin ag an am céanna.
An é iógart an t-aon rud atá ar eolas agat faoin mBulgáir? Más é, tabhair leat spúnóg i do mhála droma agus ar aghaidh leat go Sóifia! Tá neart rudaí suimiúla i bpríomhchathair na Bulgáire le feiceáil, le triail agus le hithe! Agus tú i Sóifia, molaimid turas bia saor in aisce a dhéanamh leis an gcuideachta ‘Balkan bites’. Agus tú ag fánaíocht sa chathair álainn seo, déanfaidh tú stop ag 5 shiopa agus bhialann éagsúla chun foghlaim faoi shainiúlacht bia na Bulgáire. Agus más fearr leat eolas a chur ar an gcathair i d’aonar, íoslódáil léarscáil idirghníomhach Shóifia! Tá príomhchathair na Bulgáire ag obair léi chun bheith ina cathair chliste. Ghlac Sóifia páirt sa tionscnamh Dúshlán Cathracha Digiteacha de chuid an Choimisiúin Eorpaigh chun Ionad Barr Feabhais Mórshonraí nua a chruthú. Shuiteáil an phríomhchathair 22 phointe rochtana ardchaighdeáin gan sreang freisin, agus cuireann siad Wi-Fi 100 Mb/s ar fáil saor in aisce.
Áit a raibh an teideal ‘Príomhchathair Chultúir na hEorpa’ uirthi roimhe, tá meascán uathúil de shainchomharthaí stairiúla, traidisiúin chultúrtha agus bia blasta le fáil in Thessaloniki. Bainfidh tú 2 cheann de na rudaí is díol spéise sa chathair amach ón limistéar ar imeall an uisce: an Túr Bán agus an Ceoláras. Agus tú ag spaisteoireacht feadh an chósta, beidh tú in ann taitneamh a bhaint as áille luí na gréine. Dóibh siúd ar breá leo an t-iarnród, molaimid cuairt a thabhairt ar Reilig Traenach Thessaloniki. Agus tú sa chathair beidh rochtain Wi-Fi saor in aisce agat trí 16 bhall the. Is é is aidhm do Bhardas Thessaloniki a bheith níos nuálaí. Tá sé tiomanta do thionscnamh leanúnach chun a sheirbhísí poiblí a dhigitiú. Seoladh ardán cathartha sa chathair Ghréagach seo chun gur féidir le saoránaigh dúshláin a chur isteach atá roimh an bpobal áitiúil.
An raibh a fhios agat gurb í an Aithin an chéad phríomhchathair san Eoraip? Tá daoine ina gcónaí sa chathair go leanúnach ó 3,000 B.C. i leith. Cé go mbaineann stair shuntasach leis an gcathair Ghréagach seo, ní hé sin an t-aon fháth amháin ar cheart duit cuairt a thabhairt uirthi. Tar éis cuairt a thabhairt ar an Acrapoil agus an Partanón, nach ceart a chailleadh, tabhair aghaidh ar Plaka. Is é an lár stairiúil sin do choisithe an áit fhoirfe chun bheith ag spaisteoireacht agus sult a bhaint as bia agus deochanna na Gréige. In ainneoin a fréamhacha ársa, is cathair an-nua-aimseartha í an Aithin. Ainmníodh í mar Phríomhchathair Nuálaíochta na hEorpa 2018. Le haip an Chórais Busanna agus aip Mheitreo na hAithne, beidh tú in ann rochtain dhigiteach a fháil ar na bealaí uirbeacha go léir. Reáchtáiltear tionscnaimh dhigiteacha éagsúla uas-scilithe agus athscilithe san Aithin atá ceaptha chun nuálaíochtaí cathrach cliste a spreagadh.
