Fáilte go dtí ceann de na príomhchathracha is nasctha san Eoraip! Tá clú agus cáil ar Liospóin mar gheall ar a cnoic áille, agus ceann de na heispéiris a chaithfidh tú a dhéanamh ná dul ar thuras ar thram 28 na cathrach a bhfuil dath buí geal air. Ná déan dearmad dul ar shiúlóid thart timpeall cheantar Mouraria agus sult a bhaint as an ealaín sráide áitiúil. Déan stop ag bácús chun triail a bhaint as pastéis de nata – custard uachtair uibhe a bhfuil cainéal agus siúcra reoáin ar a bharr. An-bhlasta! San iarnóin, tabhair aghaidh ar Castelo de São Jorge a tógadh san 11ú haois chun na radhairc is fearr a fháil ar an gcathair ag titim na hoíche. Ba í ‘cathair an tsolais’ buaiteoir Ghradaim Phríomhchathair Ghlas na hEorpa 2020. Ba é ba chúis leis an mbuachan sin, i bpáirt, straitéis cathrach cliste Liospóin ina bhfuil píolótú á dhéanamh ar cheantair fhuinneamhéifeachtúla, líonra cliste soilsithe sráide, pointí luchtaithe d’fheithiclí leictreacha agus ardán digitithe iompair phoiblí, i measc tionscadal nuálaíochta eile.

Cén fáth ar cheart cuairt a thabhairt air? Is dócha nach é Badajoz an chéad chathair Spáinneach a gcloisfidh tú trácht air, ach tá go leor le tairiscint aige. Mar sin, molaimid duit an baile a chur le do chúrsa taistil DiscoverEU. Bhí cur amach i gcónaí ar Badajoz i ngeall ar a chóngaraí atá sé do theorainn na Portaingéile. Tá an baile Spáinneach seo lán seoda ailtireachta a bhuí lena oidhreacht ilchultúrtha. Téigh ar shiúlóid thart ar an gceathrú stairiúil agus feicfidh tú ballaí Arabacha, séadchomharthaí spreagúla agus sráideanna agus póirsí pictiúrtha. Ag La Alcazaba, dúnfort ársa Múrach, beidh tú in ann taitneamh a bhaint as radhairc iontacha den chathair! Tá an chathair stairiúil diongbháilte a bheith ina cathair chliste. Tá seirbhísí nuálacha ar fud na cathrach leagtha síos aige, ina measc sin bainistíocht chliste dramhaíola, bainistíocht chliste timthrialla uisce

Cén fáth ar cheart cuairt a thabhairt air? Ó mhúsaeim cáiliúla domhanda go dtí an tsiamsaíocht oíche sna beáir bheoga, tá go leor roghanna ar fáil i Maidrid do gach cineál cuairteora. Agus tú i Maidrid, téigh ar shiúlóid chuig Plaza Mayor (‘cearnóg an bhaile’), sainchomhartha ailtireachta arbh é an túsphointe do nuachóiriú an Rí Pilib II ar Mhaidrid sa 16ú haois. In aice leis sin tá ceann de na codanna is gnóthaí den chathair, is é sin an chearnóg phoiblí Puerta del Sol. Má tá tú ag lorg suaimhnis tá Parque del Buen Retiro in aice láimhe freisin, páirc mhaorga inar féidir dul ar shiúlóid agus sos beag a ghlacadh. Agus tú i Maidrid, beidh tú in ann úsáid a bhaint as na pointí luchtaithe guthán póca saor in aisce sa mheitreo agus Wi-Fi saor in aisce ar gach bus idirchathrach. Má tá fonn ealaíne ort, molaimid duit dul go Músaem Prado chun taitneamh a bhaint as eispéireas réaltachta fíorúla 360°. Tabharfaidh sé deis duit dul níos gaire do na saothair ealaíne agus na déantáin ná riamh roimhe!

Bí réidh le stopadh i gceann de na cathracha is cliste ar domhan: Bilbao! Agus tú sa chathair, beidh tú in ann nascadh le ceann dá 200 ball te Wi-Fi saor in aisce. Bain sult as dul isteach i gcroí cultúrtha na cathrach trí chuairt a thabhairt ar Mhúsaem Guggenheim agus ar Ionad Azkuna, go bhfaighe tú na ‘pintxos’ is fearr sa chathair! Tá Bilbao ar cheann de na cathracha is ‘avant-garde’ sa Spáinn freisin. Tá sé tiomanta go háirithe luachanna an duine a chur chun cinn trí chuspóirí cathrach cliste. In 2018 d’fhoilsigh Bilbao a Chairt Luachanna, inar leagadh amach a mhianta maidir leis an gceartas sóisialta, an comhionannas inscne, agus an éagsúlacht agus an cuimsiú a chur chun cinn. In 2013 fuair Bilbao moladh speisialta freisin maidir le hinrochtaineacht, mar gheall ar roinnt tionscnaimh amhail suíomh gréasáin inrochtana a deimhníodh go neamhspleách agus seirbhísí físchomhdhála d’úsáideoirí teanga comharthaíochta. 

Cé go mbíonn go leor daoine ag teacht go Bordeaux le haghaidh an fhíona, tá i bhfad níos mó i gceist le ‘Calafort na Gealaí’! Sa chathair seo in iardheisceart na Fraince, beidh tú in ann bia iontach a bhlaiseadh, dul ag siopadóireacht, blaiseadh a fháil den tsiamsaíocht spraíúil oíche agus tuilleadh nach iad. Agus tú in Bordeaux beidh rochtain agat ar Wi-Fi saor in aisce, rud atá á chur ar fáil ar fud lár na cathrach. Ceangail leis agus téigh ar thuras ealaíne sráide i gceantar Chartrons le do ghuthán cliste! Ó 2017 i leith, tá an chathair Fhrancach seo ag úsáid Idirlíon na Rudaí Nithiúla chun bheith níos nuálaí agus níos inbhuanaithe, agus chun feabhas a chur ar na seirbhísí poiblí, amhail soilsiú cliste, bainistiú dramhaíola agus an tsoghluaisteacht. Ar deireadh, sheol an chathair feidhmchlár tráchta chliste chun plódú tráchta, rioscaí timpiste agus truailliú a laghdú.

Cé gur mór an t-iontas é, feicfidh tú eilifint in Nantes! Tá an t-ainmhí íocónach seo anois ina shiombail den chathair. Téigh go ‘Machines de l’Île’ chun é a fheiceáil agus téigh ar shiúlóid feadh an Loire chun cuairt a thabhairt ar ‘Hangar à bananes’. Ina dhiaidh sin, bíodh cur chuige glas agat; tabhair cuairt ar ‘Jardin des Plantes’ go bhfeice tú na dealbha iontacha agus an teach gloine Taispeántais. Lean ar aghaidh isteach sa seanbhaile agus siúil tríd an ionad iontach siopadóireachta Passage Pommeraye. Cé gur cathair stairiúil é Nantes, ainmníodh é mar Phríomhchathair Nuálaíochta na hEorpa 2019. Tá sé tiomanta d’aistriú digiteach na ngnólachtaí. Cuidíonn ‘Cathair na nDiúc’ anois le nuálaíocht a chur chun cinn ar fud na cathrach. Agus tú i Nantes, íoslódáil an aip ‘Nantes dans ma poche’ chun an t-eolas áitiúil cuidiúil go léir a fháil. Ghnóthaigh an chathair an dara háit sna Gradaim don Chathair is Inrochtana in 2013 freisin as a cur chuige maidir le Nantes a dhéanamh inrochtana do chách agus as réimse éagsúil gníomhaíochtaí chun feasacht a ardú ar an inrochtaineacht sa saol laethúil. 

Fáilte go dtí an t-aon Ard-Diúcacht cheannasach ar domhan! Meascán is ea Cathair Lucsamburg den saol ársa agus an saol nua-aimseartha, an saol áitiúil agus an saol domhanda, an saol simplí agus an saol sómasach. Téigh ar shiúlóid timpeall an tseanbhaile ar na sráideanna cúnga lúbacha. Tá an ceantar seo thar barr chun taitneamh a bhaint as radhairc iontacha ar fhoirgnimh stairiúla agus ar dhroichid chloiche na cathrach trasna na habhann, agus iar-dhaingean bhallaí bunaidh Chathair Lucsamburg. Tá córas iompair phoiblí den scoth ag Cathair Lucsamburg ina bhfuil roinnt nuálaíochtaí do dhaoine faoi mhíchumas, rud a chuidigh leis an gcathair an chéad áit a bhaint sna Gradaim don Chathair is Inrochtana 2022. Sheol Cathair Lucsamburg an aip don chathair in 2020, rud a chuireann eolas ar fáil ar fud na cathrach, amhail amanna bus, eolas faoi spásanna páirceála agus rothair phoiblí atá ar fáil, agus rud lenar féidir le húsáideoirí teagmháil a dhéanamh le hoifigigh. Bain úsáid as an aip chun an chonair rothaíochta ‘ar foluain’ atá ar crochadh faoin droichead cáiliúil Pont Adolphe a bhaint amach