Велосипедска патека Виа Рона долга 815 км, која минува низ Лион, им нуди на патниците на DiscoverEU можност да го истражат југот на Франција на одржлив начин, на две тркала. Велосипедската патека го следи кривулестиот тек на реката Рона низ долини и насади од маслинки, почнувајќи од Женевското Езеро до Лион и на крај до медитеранските плажи на Франција. Ако имаш слободно попладне, зошто да не ја искористиш патеката за да ја откриеш убавината на регионот?

Торино ги пречекува своите посетители со уникатна и импресивна мешавина од архитектура, уметност, историја и храна – има ли тука нешто да не се сака? Како финалист за наградата Европска зелена престолнина за 2022, градот нуди бројни еко-настроени работи да се видат и прават. Една од нив е Парко натурале дела Колина ди Суперга, парк заштитен од ЕУ во рамките на мрежата Натура 2000, и парк кој нуди неповторлив поглед на градот и Алпите позади него. Не само што паркот е дом на уникатни растителни и животински видови уникатни за овој регион на Италија – од кои повеќе може да се видат во Регионалниот музеј на природни науки во центарот на градот – туку овде се наоѓа и Базиликата Суперга, уникатна барокна црква и вечно почивалиште на многу кралски членови од династијата Савој. Неколку пешачки патеки водат од градот до базиликата, вклучувајќи ги и Сентиеро 28, 29 и 61, или може да се користи железницата со нагиб, која води директно до врвот. Избери ја твојата рута, направи пикник и уживај во глетката!

Како Европска престолнина на културата за 2020 година – титула што ја дели со Галвеј во Ирска – овој хрватски крајбрежен град нуди многу да се види и прави за патниците кои ја истражуваат југоисточна Европа. Регионот северно од градот е Горски Котар – познат и како „зелените бели дробови на Хрватска“ – исполнет со диви шуми, благи планини и мирни езера. Како определена локација во рамки на мрежата Натура 2000 дивиот свет на областа е заштитен од ЕУ. Патниците на DiscoverEU можат да го истражат кањонот на реката Купа или да се возат со чамец низ некое од езерата во регионот.

Словенечкиот главен град Љубљана се опишува себеси како "град со зелена душа". Наградена со титулата Европска зелена престолнина во 2016 година, Љубљана се трансформира во еко-жариште во текот на изминатата деценија, намалувајќи го акцентот на патувањето со автомобил и промовирајќи повеќе простор за пешаци и велосипедизам. Дури три четвртини од градот се покриени со паркови, градини и други зелени површини – затоа задолжително искачи се на врвот во Љубљанскиот замок за да добиеш најдобар поглед на зеленилото на градот. Градот, исто така, засадил над 2.000 дрвја за 10 години и доделил дел од локалната шума за да го апсорбира вишокот на јаглероден диоксид.

Од позлатените палати до легендарните жители – (како што се Моцарт, електронското дуо Камо & Крукед и холивудската ѕвезда Кристоф Валц – австриската престолнина Виена е задолжителна станица за секој патник што ја истражува Европа; Градот има преку 2.000 паркови и градини, кои може да ги посетиш според твоја желба, користејќи ги некои од 1.400-те километри велосипедски патеки на градот. За авантуристичките патници, Виенервалд, шумска област заштитена од ЕУ како место кое е дел од мрежата Натура 2000, исто така се наоѓа на само чекор од градот.

Градот Знојмо се наоѓа во подножјето на прекрасниот Национален парк Подуји. Паркот се простира на 63 квадратни километри и е дом на 77 вида растенија и 152 вида птици. Авантуристичките патници на DiscoverEU може да бидат заинтересирани да дознаат дека паркот е дом и на бројни урнатини, вклучувајќи го и добро сочуваниот замок Нови Храдек. Како определена локација во рамки на мрежата Натура 2000 ЕУ ја заштитила областа за да осигура дека генерации на истражувачи ќе можат да уживаат во прошетките по карпестите патеки на паркот.