Viana do Castelo tinsab f’reġjun ta’ ġmiel naturali eċċezzjonali, u toffri opportunitajiet fantastiċi biex toħroġ barra u tkun attiv billi ssuq ir-rota jew timxi mal-kosta. Viana do Castelo ospitat rotta taċ-ċikliżmu bħala parti mill-Ġimgħa Ewropea tal-Isport fl-2023 u se terġa’ tagħmel dan fl-2024, mela ċċekkja r-rotot jekk għandek bżonn l-ispirazzjoni. Il-belt toffri wkoll aċċess faċli għal bajjiet sbieħ biex tgħum jew timxi u hi post magħruf għas-surfing, il-windsurfing, il-kite surfing u l-bodyboarding. Jekk tħobb tiċċaqlaq, din il-belt fit-Tramuntana tal-Portugall toffri ħafna għażliet.

Santiago de Compostela hija l-kapitali reġjonali tal-Galicia, magħrufa għall-foresti, il-widien bl-imsaġar, il-bajjiet selvaġġi u l-fanali tal-portijiet. Uża lil Santiago bħala l-punt tat-tluq biex tesplora n-natura tal-Galicia, bħall-irdumijiet tal-Costa da Morte, il-Park Nazzjonali Islas Atlánticas, il-bajja Las Catedrales, il-mixja tal-Fanal tal-Port jew il-canyons tax-Xmajjar Sil u Miño. Santiago de Compostela hi magħrufa wkoll bħala l-aħħar waqfa tal-Camino de Santiago, pellegrinaġġ famuż b’diversi punti tat-tluq fl-Ewropa kollha. Jekk tixtieq tisfida lilek innifsek b’mixja fit-tul, tista’ tippruvah. Għal dawk li jippreferu jivvjaġġaw fuq żewġ roti, hi wkoll l-aħħar waqfa tal-EuroVelo rotta 3.

Donostia-San Sebastián hi belt tal-ħolm. Kumpatta u adatta għall-mixi, hemm ukoll 3 bajjiet sbieħ fiċ-ċentru tal-belt, u b’hekk faċli tmur tgħum. Meta tkun hemm tista’ titgħallem dwar il-logħba tradizzjonali Baska, il-pelota jew tara sport tradizzjonali ieħor u tispira ruħek. Jekk dan l-isport kollu jqabdek il-ġuħ, ieqaf u pprova ftit pinchos, snacks żgħar tipiċi tar-reġjun, li normalment iservuhom fuq stikka. Huma żgħar allura hu mod tajjeb kif tipprova ħafna togħmiet differenti. Il-belt hi mdawra wkoll bl-għoljiet, li joffru opportunitajiet għall-mixi jew il-mountain biking.

X’nistgħu ngħidu dwar Pariġi li għadu ma ntqalx? Pariġi, il-belt illuminata, se tospita l-Logħob Olimpiku fl-2024 fiċ-ċentenarju tal-Olimpjadi ta’ Pariġi tal-1924, biex b’hekk din se tkun is-sitt darba li Franza se tospita l-Logħob Olimpiku. Jekk ma jirnexxilekx issib biljett għal-Logħob, imxi bħal flaneur ta’ veru u apprezza s-siti, l-arkitettura, il-kafetteriji, il-ħwienet u t-toroq Pariġini famużi mad-dinja kollha. Tista’ tgħaddi qalb il-parks fil-belt jew taqsam il-Promenade Plantée, mixja ta’ 5 km li qabel kienet vijadott abbandunat tas-seklu 19 u issa hu park elevat.

Bħala l-ospitanta tal-ewwel Olimpjadi tax-xitwa fl-1924, Chamonix għandha storja venerabbli bħala post għall-iskijjar, is-sledding, is-snowshoeing, it-tixbit u ħafna aktar. Fil-parti t’isfel tal-Mont Blanc, l-ogħla quċċata fl-Alpi, Chamonix hu post mill-isbaħ biex iżżuru. Għalkemm huwa bil-kbir magħruf l-iktar għall-iskijjar, xorta hemm ħafna attivitajiet għal dawk li ma jiskijjawx. U jekk ikollok bżonn timla żaqqek wara jum attiv barra fil-kesħa, ipprova ikla Alpina tar-reġjun bħall-fondue (ġobon maħlul) jew ir-raclette (aktar ġobon maħlul). 

Jekk ġieli żort Franza u osservajt grupp ta’ nies f’park ipaċpċu u jkejlu d-distanza bejn blalen tal-fidda, int familjari mal-pétanque, logħba klassika Franċiża vvintata minn La Ciotat. Meta żżur dan il-post sabiħ fil-kosta tan-Nofsinhar ta’ Franza, faċli tifhem għaliex logħba rilassanti u soċjali bħall-pétanque ġiet ivvintata hawn. Waħda mill-aħjar affarijiet li tista' tagħmel f’La Ciotat hi li tippassiġġa fil-villaġġ qabel ma tmur f’waħda mill-bajjiet aċċessibbli faċilment għal għawma jew tieqaf għal ikla lokali bħall-pistou, soppa tal-ħxejjex staġjonali mir-reġjun tal-Provence. Jekk ikollok aptit ta’ xi ħaġa iktar impenjattiva, hemm ħafna mixjiet sbieħ madwar il-kosta.