U-Report: is-setgħa li tagħmel differenza b’ponot subgħajk

L-aħħar aġġornament sar fi It-Tlieta, 29/09/2020

Mill-Ukrajna sal-Mozambique, U-Report, l-għodda ta’ skambju ta’ messaġġi soċjali bla ħlas tal-UNICEF, qed tagħti liż-żgħażagħ fid-dinja kollha mod kif isemmgħu leħinhom u jilħqu lil dawk li jieħdu d-deċiżjonijiet.

Bl-għajnuna mill-UE, dan jista’ jissarraf f’bidliet pożittivi f’ħajjithom.

Fid-dinja kollha, żgħażagħ bħalek qed jużaw il-ponot ta’ subgħajhom biex jagħmlu differenza fejn jgħixu. Iżda mhux permezz ta’ Twitter, Facebook, Snapchat jew Instagram. Qed nitkellmu dwar il-U-Report.

Aqbad il-mobile tiegħek u segwi l-U-Report Global fuq Facebook Messenger. Din hi għodda bla ħlas ta’ skambju ta’ messaġġi maħluqa mill-UNICEF. Faċli tintuża, kunfidenzjali u tipprovdi informazzjoni u feedback f’ħin reali. 

X’se tiggwadanja?

Tkun tista’ tlissen fehmtek dwar kwistjonijiet li jaffettwaw il-viċinat tiegħek. Tkun tista’ tgħid lill-mexxejja tal-komunità tiegħek x’qed iħassbek jew jinkwetak, x'qed iżommok imqajjem bil-lejl, jew x’bidliet tixtieq tara fiż-żona tiegħek. Tkun tista’ tikseb informazzjoni aġġornata dwar kwistjonijiet bħas-saħħa, is-sanità, l-impjiegi, l-HIV/Aids, il-coronavirus, jew affarijiet oħra li huma importanti għalik.

L-NGOs, is-soċjetà ċivili, l-uffiċjali tal-gvern u l-mexxejja eletti jistgħu jaraw l-informazzjoni ppowstjata fis-sit tal-U-Report biex jifhmu dak li teħtieġ u jagħmlu l-bidliet.

Diġà hemm aktar minn 11-il miljun U-reporter f’67 pajjiż, mir-Repubblika Dominicana sal-Indoneżja. Allura x’inti tistenna?

Inċaqalqu l-Ukrajna

Biex l-affarijiet tad-dinja diġitali jaslu fid-dinja reali, il-U-Report jorganizza avvenimenti li jlaqqgħu flimkien il-U-reporters.
“Mill-Ħolm għall-Azzjoni” hu forum annwali għal dawk li jipparteċipaw regolarment fl-istħarriġiet tal-U-Report. L-avveniment jippermetti lil żgħażagħ bħalek li jiltaqgħu u jaqsmu ideat dwar kif tista’ ssir forza għall-ġid. 

F’Ottubru 2018 dan sar fi Sviatohirsk, belt fil-parti tal-Lvant tal-Ukrajna milquta mill-kunflitt. Sebgħin ġurnalist fi 18-il tim mill-Ukrajna kollha attendew l-avveniment fejn tgħallmu ħiliet biex jiżviluppaw u jimplimentaw il-proġetti tagħhom, xi ħaġa li mhux dejjem titgħallem mill-iskola.

Ara x’kellu xi jgħid wieħed mill-membri ta’ StudySpace Urban Library – Mariupol project dwaru: “L-aspettattivi tagħna diġà qed isiru realtà. Tassew ksibna għarfien interessanti mill-panels u l-workshops, dwar il-parteċipazzjoni taż-żgħażagħ f’attivitajiet ċiviċi, u kif nagħmlu l-parteċipazzjoni taż-żgħażagħ effettiva.” Il-proġett tagħhom kien dwar il-ħolqien ta’ postijiet biex jiddiskutu u jiżviluppaw ideat biex tittejjeb il-ħajja fil-belt tagħhom.

Ħames timijiet irċevew finanzjament biex il-ħolm tagħhom isir realtà. Dawn kienu jinkludu inkuraġġiment liż-żgħażagħ biex jagħmlu spedizzjonijiet f’postijiet inqas magħrufa fl-Ukrajna, korsijiet ta’ mmudellar 3D, taħriġ fil-ħiliet ta’ tmexxija, u proġett biex tiġi stabbilita sistema għall-ġestjoni tal-iskart f’villaġġ qrib iż-żona tal-kunflitt. 

Bl-użu tal-U-Report, kull tim ħeġġeġ bejn 100 u 500 mill-ħbieb tiegħu biex jingħaqdu mal-proġetti tiegħu.

Il-UNICEF u l-UE jingħaqdu flimkien għaż-żgħażagħ

It-tfal tal-iskola Ukreni li jgħixu f’żoni milquta mill-kunflitt iħabbtu wiċċhom ma’ problemi bħal nuqqas ta’ provvisti tal-iġjene, privatezza matul il-menstruwazzjoni, u aċċess għat-tojlits.
It-tfal m’għandhomx aċċess għal informazzjoni dwar is-saħħa sesswali u l-iġjene menstruwali – ftit li xejn hemm diskussjoni dwar dawn is-suġġetti. Xi bniet jiffaċċjaw ibbuljar jew fastidju minn bniet oħra dwar il-menstruwazzjoni.

Dan ġie żvelat permezz ta’ stħarriġ tal-U-Report immexxi fiż-żoni ta’ Donetsk u Luhansk, fejn ħadu sehem 9,000 żagħżugħ u żagħżugħa. It-tfal ġew mistoqsija dwar suġġetti bħas-sikurezza online u l-prevenzjoni tal-vjolenza, it-tibdil fil-klima, ir-riżoluzzjoni tal-kunflitti, l-impenn ċiviku, il-kura tas-saħħa, u l-edukazzjoni.

Kienu qed jipparteċipaw bħala parti minn proġett iffinanzjat mill-UNICEF u mill-UE biex jgħin liż-żgħażagħ f’dik il-parti tal-Ewropa. Bis-saħħa tal-ħidma fi grupp f’dawn l-organizzazzjonijiet, tnedew kampanji dwar is-saħħa tan-nisa, tqassmu pakketti ta’ iġjene u tjiebu l-faċilitajiet sanitarji fl-iskejjel.

Eroj fil-Mozambique

“Inħossni bħal eroj. Issa nista’ nagħmel għażliet konxji. Ngħin lill-bniet li għaddejjin mill-istess sitwazzjoni tiegħi. Naqsam l-istorja tiegħi u niggwida l-għażliet tagħhom.”
Dan hu l-kliem ta’ Filomena, mara ta’ 22 sena mill-Mozambique li qed tgħin lill-bniet jegħlbu diffikultajiet bħal dawk li ffaċċjat meta kienet qed tikber. Fil-Mozambique, il-U-Report jissejjaħ SMS Biz.
Filomena hi waħda mill-bosta mentors imħarrġa mill-programm SMS Biz biex tgħin lill-pari tagħha. Hi twieġeb għall-SMSs tagħhom dwar kwistjonijiet bħaż-żwieġ tat-tfal, il-vjolenza, l-HIV u s-saħħa tal-adolexxenti.

’Il fuq minn 291,000 tifel u tifla f’dan il-pajjiż illinkjaw ma’ dan is-servizz. Iwassal tweġibiet lill-bniet u s-subien għal mistoqsijiet li spiss ma jħossuhomx komdi jistaqsu lill-adulti, bħal x’inhuma d-drittijiet tagħhom, dwar ir-relazzjonijiet, is-sesswalità u l-HIV u l-AIDS.

Bis-saħħa ta’ ħidma f’tim bejn l-Inizjattiva Spotlight u SMS Biz, qed jiġu stabbiliti ċentri ta’ konsulenza. Hawnhekk, nisa żgħażagħ jitħarrġu bħala mentors u jiġu mgħallma kif iwieġbu l-mistoqsijiet li jsiru permezz tal-SMS, li jfisser li aktar nies jistgħu jaċċessaw l-għajnuna aktar malajr. 

Iċ-ċentru li qed jiġi stabbilit fil-provinċja ta’ Nampula fil-Mozambique qed iħarreġ madwar 20 mentor li bejniethom jistgħu jwieġbu sa 30,000 mistoqsija fix-xahar.
Hu importanti li jkun hemm aċċess għal informazzjoni bħal din. L-Inizjattiva Spotlight tgħid li madwar 46% tal-bniet fil-Mozambique bejn 15 u 19-il sena jew ħarġu tqal jew diġà għandhom it-tfal. 

Nuqqas ta’ aċċess għall-edukazzjoni, flimkien mal-vjolenza bbażata fuq is-sess, qed iwaqqfuhom milli jilħqu l-potenzjal tagħhom.
Mela għaliex ma tgħinx biex jinkiseb ftit potenzjal u tħaddem dawk is-swaba’!