Más maith leat cuairt a thabhairt ar chathracha le go leor spásanna glasa, is í Kraków an chathair duit. Bhí Kraków ainmnithe sa bhabhta ceannais de Phríomhchathair Ghlas na hEorpa 2023, agus is éard a chuirtear ar fáil inti 207m2 de spás glas do gach duine atá ina gcónaí ann. An Seanbhaile, atá liostaithe ag UNESCO, is do choisithe amháin é agus is baile álainn é le dul ag spaisteoireacht ann. Mar a tharlaíonn sé, tá sé an-éasca do gach uile dhuine a mbealach a dhéanamh timpeall air, agus is léir é sin ón gcaoi ar bhain an chathair an dara háit amach i nGradaim don Chathair is Inrochtana 2012. Más spéis leat siúlóid beagán níos faide a dhéanamh, téigh chuig Páirc Planty, crios glas de níos mó ná 200,000m2 atá thart ar an Seanbhaile. Cuireadh an crios sin ann in ionad na ndaingnithe meánaoiseacha a bhíodh ann roimpi. Má tá níos mó dúlra uait go fóill, téigh ar turas tram gearr ó lár na cathrach agus chun cuairt a thabhairt ar mhóinéir, ar fhoraoisí agus ar anaclanna dúlra.
Is geall le bolgam aeir é Brno, ach is ósais ghlas í. Ón iliomad páirceanna agus gairdíní atá le fáil sa chathair, agus a gcarachtar uathúil ag gach ceann acu mar aon le rudaí spéisiúla le déanamh iontu, go páirc fianna díreach lasmuigh den chathair agus rochtain éasca uirthi ar iompar poiblí, tá an t-uafás áiteanna le ceangal leis an nádúr. Mar shampla, is spás oideachasúil é na Gairdíní Oscailte le teach éighníomhach uathúil le díon glas agus agus conair oideachasúil. Más fearr leat do scíth a ligean ar bhealach níos gníomhaí, molaimid duit Špilberk a dhreapadh agus cuairt a thabhairt ar an gcaisleán ón 13ú haois ar a bharr, sin nó buail ar aghaidh chuig taiscumar Brno - áit iontach chun spórt a imirt agus do scíth a ligean. Is féidir leat freisin cuairt a thabhairt ar Ghairdín na Lus agus tuilleadh eolais a fháil faoi phlandaí.
Is í Graz príomhchathair Styria, nó ‘Croí Glas’ na hOstaire mar a thugtar uirthi i ngeall ar a limistéir mhóra ghlasa. A bhuí leis sin, tá neart deiseanna le dul amach faoin aer sa dúlra agus taitneamh a bhaint as éifeachtaí leighis an ghlasra. Beidh go leor roghanna agat maidir le háiteanna chun dul ag siúl, ag rothaíocht nó ag sciáil. Tá an t-uafás gradam bainte amach ag Graz a chruthaíonn an rath atá uirthi mar chathair ghlas chultúrtha: tá sí sa bhabhta ceannais do Ghradam do Phríomhchathair Ghlas na hEorpa 2025, Príomhchathracha Cultúir na hEorpa 2003 agus tá an Lár Stairiúil agus Schloss Eggenberg liostaithe ag UNESCO. Más mian leat tú féin a thumadh go hiomlán sa dúlra, is féidir leat obair dheonach a dhéanamh ar fheirm orgánach trí ghluaiseacht WWOOF (Deiseanna ar fud an Domhain ar Fheirmeacha Orgánacha).
Dearadh Velenje sna 1950idí mar chathair ghairdín, agus dá bhrí sin bhí an duilliúr mar chuid dá DNA ón gcéad lá riamh. Lean sí dá tiomantas don chomhshaol agus bhuaigh sí Duilleog Ghlas Eorpach 2024 a bhuí le plean na cathrach le haghaidh deiseanna nua fostaíochta san earnáil ghlas. Tá sí ar cheann de na cathracha píolótacha freisin i Misean na gCathracha Aeráidneodracha atá á mhaoiniú ag an gCoimisiún Eorpach. Nuair a bheidh tú ann, téigh ar shiúlóid feadh an Promenada atá ar cheann de phríomhais na cathrach, agus tá athchóiriú á dhéanamh air chun tús áite a thabhairt don duilliúr agus spás do dhaoine, nó tabhair cuairt ar thrá Velenja, a bhfuil an-tóir ag muintir na háite air. Ansin, tiocfaidh tú ar uisce glan le dul ag snámh ann agus ní bheidh ach siúlóid ghearr ón mbaile agat chun an trá a bhaint amach.
Tá Salzburg lonnaithe ar theorainn thuaidh na nAlp agus is stad idéalach í chun gníomhaíochtaí amuigh faoin aer a dhéanamh a thabharfaidh níos gaire don nádúr thú, cuir i gcás fánaíocht nó rothaíocht sléibhe. In Salzburg, a bhuí leis an raidhse gníomhaíochtaí geimhridh, cuir i gcás scátaí oighir, sciáil trastíre agus fánaíocht crú sneachta, níl aon chúis agat fanacht laistigh nuair a bhíonn sé fuar. Cuir éadaí teolaí ort agus cuir eolas ar an dúlra ó cheann ceann na bliana! Tá lár na cathrach liostaithe mar áit Oidhreachta Domhanda UNESCO agus is áit álainn í le dul ag spaisteoireacht timpeall, nó d’fhéadfá cuairt a thabhairt saor in aisce ar ghairdíní Schloss Hellbrunn, nó an áit a bhfuil an pailliún ó The Sound of Music.
Tá Lichtinstéin suite go hiomlán sna hAlpa agus tá sí clúdaithe le foraoisí. Is áit fhoirfe í do dhaoine ar spéis leo eachtraí amuigh faoin aer agus is bunáit iontach í Triesen. Téigh ar an rian dúlra a thógfaidh 100 méadar suas ó Ghleann na Réine thú go dtí séipéal luath meánaoiseach Naomh Mamerta, é suite os cionn Triesen. Nó más mian leat dúshlán ceart a thabhairt do na cosa, cén fáth nach mbainfeá triail as Conair Lichtinstéin 75km? Cá háit eile a bhféadfá siúl timpeall na tíre ar fad laistigh de dheireadh seachtaine? Nó más fearr leat do bhealach a dhéanamh thart ar 2 roth, tá neart bealaí le cuallaí eolais maithe orthu, rud a fhágann gur áit iontach í Lichtinstéin do rothaithe sléibhe.
Tá Gaillimh crochta ar chósta thiar fhiáin na hÉireann (ar a dtugtar Oileán Iathghlas Éireann freisin toisc go bhfuil sí chomh glas sin). Bhí an bua aici sa chomórtas do chathair na Duilleoige Glaise Eorpaí in 2017 mar gheall ar a tiomantas don inbhuanaitheacht. Más mian leat nochtach a fháil ar an tuath agus cuairt a thabhairt ar chuid de láithreacha cáiliúla na hÉireann, is bunáit iontach í Gaillimh le dul chuig áiteanna ar nós Aillte an Mhótair nó cnoic Chonamara. Nó téigh ar shiúlóid feadh Shlí an Atlantaigh Fhiáin atá ar cheann de na bealaí cósta is faide ar domhan (2,600km). Leanann sé cósta na hÉireann ó Leithinis Inis Eoghain sa tuaisceart, thar Ghaillimh agus síos go Cionn tSáile sa deisceart. Nó téigh ar cuairt ar cheann de pháirceanna náisiúnta, de limistéir foraoisí agus d’anaclanna na hÉireann, iad breis agus 650 km2 d’achar.
