Irreġistra l-esperjenza ta’ volontarjat tiegħek għal prospetti ta’ impjieg aħjar!

L-aħħar aġġornament sar fi L-Erbgħa, 14/05/2025

Għall-UE, il-volontarjat hu espressjoni ta’ ċittadinanza attiva, triq ta’ tagħlim u attività essenzjali għall-iżvilupp ta’ valuri demokratiċi, id-dinjità tal-bniedem u l-ugwaljanza.

Il-volontarjat jista’ jgħinek ukoll biex issib l-opportunità ta’ impjieg li jmiss u l-UE ħolqot għodod differenti biex tgħinek fil-proċess! 

Il-parteċipazzjoni fi proġett ta’ volontarjat hi kisba sinifikanti għal kwalunkwe persuna żagħżugħa. Din hi opportunità għall-iżvilupp ta’ kompetenzi soċjali u personali u għall-kisba ta’ esperjenza professjonali prezzjuża, billi tikkontribwixxi għal ħidma f’timijiet multikulturali, issolvi l-problemi kreattivi, tuża lingwa barranija fl-immaniġġjar tal-kompiti ta’ kuljum, tgħix b’mod indipendenti f’pajjiż Ewropew ieħor u ħafna aktar. 

Dawn l-esperjenzi jgħinu lill-parteċipanti fit-tkabbir personali, kif ukoll biex isibu opportunitajiet għall-karrieri futuri u għall-mogħdijiet tat-tagħlim tagħhom. 

Esperjenzi ta’ volontarjat: valur miżjud qawwi meta wieħed ikun qed ifittex impjieg

Jekk ħadt sehem f’esperjenza ta’ volontarjat, fil-livell lokali jew internazzjonali, dejjem kun ċert li tirrifletti fuq it-tagħlim li ħareġ minnha. Normalment min iħaddem japprezza esperjenzi bħal dawn. 

Matul intervista u fis-CV tiegħek, dejjem hu tajjeb li jkollok il-kapaċità li tispjega r-riżultati tat-tagħlim ta’ esperjenza ta’ volontarjat. Min iħaddem japprezza b’mod speċjali ħiliet trasversali bħall-adattabilità, l-awtonomija, l-affidabbiltà, il-kreattività, is-sens ta’ inizjattiva. Kif żviluppajt dawk il-ħiliet u ħafna oħrajn, matul l-esperjenza tal-volontarjat tiegħek?

Kif tagħmel għal esperjenza ta’ xogħol, hu importanti li tkun tista’ tagħti dettalji dwar il-missjonijiet, il-ħiliet u l-għarfien miksubin. Jekk tista’ tikkonnettja dawk il-ħiliet mar-rekwiżiti tar-riklam tal-impjieg, aktar aħjar!

Volontarjat: esperjenza ta’ xogħol fis-CV tal-Europass tiegħek

L-UE ħolqot għodda online bla ħlas għalik biex toħloq Curriculum Vitae li jintuża fl-Ewropa kollha u li jqis l-esperjenzi tiegħek ta’ tagħlim tul il-ħajja kollha, is-CV tal-Europass. Din l-għodda tista’ tappoġġjak fil-bini ta’ karriera dinamika u fir-rikonoxximent tal-kompetenzi, professjonali u trasversali tiegħek.

Skont il-Europass, l-attivitajiet ta’ volontarjat, kollokamenti jew traineeships imħallsin jew mhux imħallsin għandhom jiġu deskritti fit-taqsima “Esperjenza ta’ xogħol” tas-CV tiegħek. Tista’ wkoll iżżid il-kompetenzi miksubin matul esperjenza ta’ volontarjat taħt it-taqsima “Ħiliet Personali”. 

Barra minn hekk, għall-esperjenzi ta’ volontarjat f’pajjiż barrani, is-CV tal-Europass jista’ jiġi kkomplementat b'anness tal-Mobbiltà Europass. Dan id-dokument għandu jimtela mill-istituzzjoni li bagħtitek. 

Iċċekkja s-sit web biex tara kif tagħmel l-aħjar li tista’ minn din l-għodda jew ikkuntattja l-punt ta’ kuntatt nazzjonali Europass tiegħek.

Rikonoxximent tal-volontarjat: il-Korp Ewropew ta’ Solidarjetà u Erasmus+

Iċ-ċertifikat tal-Youthpass hu disponibbli għall-parteċipanti kollha tal-Erasmus+ u tal-Korp Ewropew ta’ Solidarjetà fil-formati kollha tal-proġett. Mit-tnedija tiegħu fl-2007, inħarġu aktar minn miljun ċertifikat tal-Youthpass għall-parteċipanti!

L-għan hu li l-parteċipanti jkunu jistgħu jippreżentaw u jikkomunikaw aħjar ir-riżultati tat-tagħlim li kisbu matul il-parteċipazzjoni tagħhom fil-programmi. Hu jikkontribwixxi wkoll għas-sensibilizzazzjoni u r-rikonoxximent tar-riżultati tat-tagħlim taż-żgħażagħ u l-parteċipazzjoni tagħhom fil-programmi tal-UE għaż-żgħażagħ.

Il-Youthpass għandu jinftiehem bħala proċess, hu riflessjoni kostanti li jgħin fil-monitoraġġ tat-tagħlim tal-parteċipanti. L-organizzazzjonijiet li jużaw iċ-Ċertifikat tal-Youthpass jaħdmu biex itejbu l-kwalità u l-viżibbiltà tal-ħidma tagħhom u biex jirrikonoxxu t-tagħlim mhux formali u informali fl-Ewropa kollha.

Aktar informazzjoni dwar il-Youthpass, eżempji ta’ ċertifikati, videos u ħafna aktar jinsabu fis-sit web tal-Youthpass.