Niš huwa post vibranti li joffrilek l-opportunità li taqbeż il-postijiet fejn imur kulħadd u tgawdi belt Serba awtentika b’ħafna spazji ħodor fejn tista’ tirrilassa u taqta’ mill-ħajja ta’ kuljum. Għal dawk minnkom li jiddilettaw bil-makabru u b’affarijiet mhux tas-soltu, żjara f’Ćele Kula (litteralment “It-Torri tar-Ras ta’ Skeletru”) hija essenzjali. Inbena fl-1809 minn ġeneral Tork mill-kranji ta’ ribelli Serbi li kien rebaħ fuqhom, biex iservi ta’ twissija kontra xi reżistenza fil-futur. Fil-belt, fil-Park tas-Sebgħa ta’ Lulju, ħdejn ix-xmara Nišava, hemm imfakar kommemorattivi f’ġieħ personalitajiet lokali ta’ sinifikat, u dan jagħmlu ideali għal passiġġata interessanti u edukattiva. Il-Park ta’ San Sava, fil-Lvant tal-belt, huwa park għall-kwiet, bil-funtani, filwaqt li l-Park Čair fih mogħdijiet pavimentati għall-mixi u għar-roti.
Skopje hija verament belt b’xi ħaġa għal kulħadd – is-sbuħija naturali, l-arti, il-kultura, l-istorja, l-arkitettura, il-ħajja ta’ billejl. Il-kapitali tar-Repubblika tal-Maċedonja ta’ Fuq għandha minn kollox. Jekk tħobb tqatta’ l-ħin fin-natura mur f’wieħed mill-ħafna parks jew spazji ħodor tal-belt, bħall-Park tal-Belt, fil-qalba ta’ Skopje, li hu wkoll l-akbar park fil-Maċedonja ta’ Fuq, jew fil-Park Žena Borec (mara gwerriera), li fih kollezzjoni ta’ statwi u monumenti. Flimkien ma’ bliet oħrajn, Skopje qed taħdem fuq pjan ta’ azzjoni għall-bliet ekoloġiċi biex tindirizza l-isfidi ambjentali lokali u ttejjeb il-ħajja għal min jgħix fiha u għal min iżurha.
Il-komunitajiet fil-belt kapitali Bulgara ta’ Sofija huma impenjati biex iżommu din il-belt storika nadifa – għalhekk, għaliex ma żżurhomx u tagħtihom daqqa t’id? L-inizjattiva “Ejjew innaddfu l-Bulgarija flimkien” tħeġġeġ lill-voluntieri jiġbru l-iskart u jżommu t-toroq tal-belt nodfa. Ir-riċiklaġġ huwa prijorità f’Sofija – 84% tal-iskart li jinġabar jiġi rriċiklat! Il-vjaġġaturi tad-DiscoverEU li jkun jinteressahom li jqattgħu ħin fin-natura jistgħu jimxu sal-kaskata impressjonanti ta’ Boyana, li tinsab eżatt barra l-belt.
Salonka, li kienet Belt Kapitali Ewropea tal-Kultura, fiha taħlita unika ta’ monumenti u postijiet storiċi, tradizzjonijiet kulturali, u kċina tajba. Il-belt użat ukoll il-fondi tal-UE biex tittrasforma ż-żona tax-xatt fi spazju ekoloġiku, san, u pjaċevoli. Iż-żona tax-xatt tgħaqqad tnejn mill-attrazzjonijiet tal-belt li wieħed ma jistax jitlifhom: it-Torri l-Abjad u s-Sala tal-Kunċerti. Huwa l-post perfett għal mixja tul il-kosta fl-għabex. Għall-parteċipanti tad-Discover EU li jħobbu n-natura, Salonka tagħti wkoll għal fuq id-Delta Axiou, riżerva naturali tal-UE li tipproteġi l-ħajja selvaġġa li tgħix fl-artijiet mistagħdra qrib ix-xmara Axios/Vardar.
Merħba f’belt maġika fejn il-Lvant jiltaqa’ mal-Punent. Żjara f’Istanbul tkun esperjenza speċjali, bis-sekli ta’ storja, il-veduti affaxxinanti, u l-ikel inkredibbli tagħha. Fl-2021, Istanbul impenjat ruħha favur pjan ta’ azzjoni għall-bliet ekoloġiċi biex tindirizza l-isfidi ambjentali u ssir aktar ekoloġika għall-ġenerazzjonijiet futuri. Żviluppat ukoll pjan dwar il-mobbiltà urbana li se jgħin biex is-16-il miljun resident tagħha jmorru minn post għal ieħor b’mod ambjentalment sostenibbli.
