Aitheantas do chéimeanna ardoideachais san Eoraip

An nuashonrú is déanaí an An Mháirt, 07/09/2021

B’fhéidir gur mhaith leat aitheantas a fháil as do chuid staidéir i dtír eile, b’fhéidir toisc go mbeidh tú ag dul ar chlár malartaithe nó mar gheall go bhfuil tú ag iarraidh dul ag obair nó ag staidéar áit éigin eile.

Bíonn sé níos éasca aitheantas a fháil do do theastais de bharr Limistéar Eorpach an Ardoideachais.

Cén chaoi a bhfuil an t-ardoideachas leagtha amach san Eoraip?

Tá a gcóras ardoideachais féin ag Ballstáit an Aontais Eorpaigh ach tá siad ar fad mar chuid de Limistéar Eorpach an Ardoideachais. 

Cabhraíonn córas Limistéar Eorpach an Ardoideachais lena chinntiú go bhfuil na córais ardoideachais ar fud na hEorpa comhoiriúnach agus gur féidir le mic léinn, le taighdeoirí agus le lucht léinn san Eoraip comhoibriú agus staidéar nó obair a dhéanamh thar lear ar bhealach níos éasca.

Eagraítear an t-ardoideachas i gcóras ina bhfuil trí thimthriall: Céim Baitsiléara, Céim Máistir agus Dochtúireacht/PhD agus is féidir comparáid a dhéanamh idir na cáilíochtaí tríd an gCreat Eorpach um Cháilíochtaí. 

Chun é sin a dhéanamh níos éasca, d’fhorbair an tAontas Eorpach córas creidmheasa ina dtaispeántar na leibhéil choibhneasta chreidmheasa a fhaightear i dtíortha éagsúla den Aontas Eorpach: an Córas Eorpach d’Aistriú Creidmheasa.

Conas a gheobhaidh tú aitheantas do do chéim nó dioplóma acadúil?

Is “uirlisí aistrithe” iad an Córas Eorpach d’Aistriú Creidmheasa agus an Creat Eorpach um Cháilíochtaí; ní thugtar aon aitheantas uathoibríoch ar fud an Aontais Eorpaigh do dhioplómaí acadúla. Caithfidh tú dul trí nós imeachta náisiúnta chun go bhfaighidh do chéim nó do dhioplóma acadúil aitheantas i dtír eile de chuid an Aontais. D’fhéadfadh sé go dteastódh sé ar chúiseanna oibre (e.g. leibhéal iontrála i gcóras riaracháin) nó má tá fonn ort tabhairt faoi bhreis staidéir i dtír eile (seiceáil an liosta seo). 

Mura bhfuil aon chreidmheas ar fáil faoin gCóras Eorpach d’Aistriú Creidmheasa le haghaidh cúrsaí a rinne tú roimhe seo, b’fhéidir go mbeadh ort iarratas a dhéanamh ar mheastóireacht/aitheantas creidmheasa. 

Ag brath ar an tír, beidh an institiúid oideachais, an aireacht oideachais ábhartha nó an t-ionad náisiúnta aitheantais nó faisnéise acadúil freagrach as meastóireacht a dhéanamh ar do chuid staidéir roimhe seo.

I ngach cás, téigh i dteagmháil leis an ionad ENIC/NARIC sa tír inar mhaith leat go ndéanfaí measúnú ar do dhioplómaí i gcomhair "inchomparáideachta". D’fhéadfadh do thír dhúchais a bheith i gceist leis sin má fhilleann tú abhaile tar éis do chuid staidéir, nó tír eile as an Aontas Eorpach má bhogann tú ann le dul ag obair ann nó chun breis staidéir a dhéanamh.