Ir-rikonoxximent ta’ lawrji ta’ edukazzjoni għolja fl-Ewropa

L-aħħar aġġornament sar fi It-Tlieta, 07/09/2021

Forsi trid li l-istudji tiegħek jiġu rikonoxxuti f’pajjiż ieħor, forsi għax se tagħmel skambju jew minħabba li tixtieq taħdem jew tistudja xi mkien ieħor.

Iż-Żona Ewropea ta’ Edukazzjoni Għolja tagħmilha aktar faċli biex tikseb ir-rikonoxximent taċ-ċertifikati tiegħek.

Kif inhi strutturata l-edukazzjoni għolja fl-Ewropa?

L-Istati Membri tal-UE għandhom is-sistema individwali tal-edukazzjoni għolja tagħhom iżda kollha huma parti miż-Żona Ewropea ta’ Edukazzjoni Għolja (EHEA). 

Is-sistema tal-EHEA tgħin biex tiżgura li s-sistemi tal-edukazzjoni għolja fl-Ewropa kollha jkunu kompatibbli u li l-istudenti, ir-riċerkaturi u l-akkademiċi fl-Ewropa jkunu jistgħu jikkollaboraw u jistudjaw barra mill-pajjiż aktar faċilment.

L-edukazzjoni għolja hija organizzata f’sistema ta’ tliet ċikli: lawrja ta’ Baċellerat, lawrja ta’ Master’s u Dottorat/PhD filwaqt li l-kwalifiki huma komparabbli permezz tal-Qafas Ewropew tal-Kwalifiki (QEK). 

Biex dan isir eħfef, l-UE żviluppat sistema ta’ kreditu li turi livelli relattivi ta’ krediti miksuba f’pajjiżi differenti tal-UE: l-ECTS.

Kif tikseb ir-rikonoxximent tal-lawrja jew tad-diploma akkademika tiegħek?

L-ECTS u l-QEK huma “għodod ta’ traduzzjoni”, ma hemm ebda rikonoxximent awtomatiku fl-UE kollha tad-diplomi akkademiċi. Se jkollok bżonn tgħaddi minn proċedura nazzjonali biex tikseb ir-rikonoxximent tal-lawrja jew tad-diploma akkademika tiegħek f’pajjiż ieħor tal-UE. Dan jista’ jkun għal skopijiet ta’ xogħol (eż. livell ta’ dħul f’amministrazzjoni) jew jekk tixtieq tkompli l-istudji f’pajjiż differenti (ara din il-lista). 

Jekk ma jkollokx krediti tal-ECTS għall-korsijiet li għamilt fil-passat, jista' jkollok tapplika għal valutazzjoni u rikonoxximent tal-krediti. 

Skont il-pajjiż, ir-responsabbiltà għall-valutazzjoni tal-istudji tal-passat tiegħek tkun mal-istituzzjoni edukattiva, il-ministeru tal-edukazzjoni rilevanti jew iċ-ċentru nazzjonali ta’ informazzjoni jew ta’ rikonoxximent akkademiku.

Fil-każijiet kollha, ikkuntattja ċ-ċentru ENIC/NARIC tal-pajjiż fejn tixtieq li d-diplomi tiegħek ikunu valutati għat-"tqabbil". Dan jista’ jkun pajjiżek jekk tirritorna f’pajjiżek wara l-istudji tiegħek, jew pajjiż ieħor tal-UE jekk tmur hemmhekk għax-xogħol jew biex tkompli tistudja.