Rotterdam tospita l-akbar port tal-Ewropa u hija waħda mill-aktar bliet innovattivi fid-dinja. B’suċċess fl-inklużività u l-aċċessibbiltà, Rotterdam kisbet it-tieni premju fil-Premju Access City 2017. Bil-ħajja urbana vibranti u l-arkitettura moderna tagħha, mill-bini Markthal sal-pont tal-Erasmus, il-belt tospita wkoll wieħed mill-ewwel proġetti tal-Bauhaus Ewropea l-Ġdida(NEB) li qatt saru. Il-Kampus Kulturali għandu l-għan li joħloq ċentru sostenibbli għall-arti, ir-riċerka, it-tagħlim, u l-komunità fiż-żona urbana żvantaġġata tan-Nofsinhar ta’ Rotterdam.

Filwaqt li tisfrutta l-passat tagħha, Rotterdam toffri titwila ċkejkna lejn kif jistgħu jidhru l-ibliet sbieħ, inkklużivi u sostenibbli tal-futur.

Tixtieq tiskopri xi wħud minnhom? Żur Postkantoor, post impressjonanti li qabel kien l-uffiċċju postali ċentrali; jew l-ewwel skyscraper tal-Ewropa, il-Witte Huis. Jekk tippreferi arkitettura moderna, esplora De Rotterdam, bini maħsub bħala belt vertikali; jew il-Floating Office Rotterdam, binja bi tliet sulari mibnija fuq sett ta’ 15-il barkun tal-konkrit.

Waqt li tkun hemm, tinsiex iżżur il-gżira ż-żgħira ta’ Delfshaven u xi wħud mill-ħafna pubs tagħha. Tista’ tesplora wkoll il-Fabbrika tal-Ikel Fenix – suq tal-prodotti friski f’Katendrecht li jbigħ ħafna delikatezzi lokali b’togħma tajba. Jekk tixtieq ftit rilassament, mur fil-Lag ta’ Kralingen u gawdi mixja bil-kwiet hemmhekk.

Qatt smajt bil-“Brusselisation” – il-kostruzzjoni b’mod indiskriminat ta’ bini modern għoli f’postijiet fejn jistona? It-terminu huwa derivat mill-belt fejn il-fenomenu deher għall-ewwel darba fis-snin sittin u sebgħin tas-seklu l-ieħor. Brussell, filwaqt li qed tħalli l-passat tagħha warajha, issa qed tixpruna l-iżviluppi urbani permezz tar-riġenerazzjoni ta’ oqsma storiċi u l-introduzzjoni ta’ arkitettura sabiħa u sostenibbli.

Fl-2022, il-kapitali mhux uffiċjali tal-Ewropa ospitat l-ewwel Festival li qatt sar tal-Bauhaus Ewropea l-Ġdida (NEB), u turi xi eżempji tanġibbli ta’ valuri li jinsabu taħt l-inizjattiva. Il-Gare Maritime, li qabel kien stazzjon ferrovjarju li l-istruttura u l-materjali oriġinali tiegħu tħalltu ma’ disinn sabiħ u soluzzjonijiet sostenibbli, għandu 17,000 pannell solari u sistema enormi ta’ ġbir tal-ilma tax-xita. L-inizjattiva soċjali Home4less hija eżempju eċċezzjonali ieħor, li jipprovdi soluzzjonijiet ta’ għajxien modulari, adattabbli u mobbli għall-persuni mingħajr dar f’bini vakanti.

Jekk qed tfittex belt b’sorpriżi sbieħ moħbija, Brussell huwa l-post fejn għandek tmur. Erħilha għal Molenbeek u skopri l-MIMA, mużew tal-arti kontemporanju massiv mibni f’dik li qabel kienet il-birrerija Belle Vue. Skopri l-arkitettura tal-Art Nouveau ta’ Brussell billi żżur id-Dar Cauchie, il-Mużew tal-Istrument Mużikali u Dar Solvay. Imbagħad, mur lura għall-futur u żur l-Atomium, waħda mill-aktar strutturi ikoniċi ta’ Brussell; u l-Bini Europa, fejn jinsab il-Kunsill Ewropew, iċ-Ċentru tal-Viżitaturi tal-Kummissjoni Ewropea u l-kunċett arkitettoniku ġdid tiegħu, kif ukoll xi waħda mill-arkitettura riċenti l-aktar sostenibbli – u sabiħa tal-belt.

Brussell għandha saħansitra aktar x’toffri lil hinn mill-arkitettura tagħha. Żur Marolles fil-weekend u mur sas-suq tagħha, mur imxi u ħu waffle f’Bois de la Cambre, jew mur party f’teatru antik (Mirano) jew saħansitra fil-boskijiet (Jeux d’Hiver). Jekk inti tħobb għażliet alternattivi għall-postijiet popolari ħafna, kun ċert li żżur Reset, spazju kreattiv stabbilit f’bank antik fiċ-ċentru tal-belt, li issa qed jospita ljieli ta' divertiment, wirjiet, taħditiet u konferenzi.

Normalment imsejħa Esch, il-belt hija l-mutur antik industrijali tal-Lussemburgu. Wara l-kriżi tal-azzar, Esch issa għandha l-għan li tkun prototip u ċentru ta’ diskussjoni għall-Bauhaus Ewropea l-Ġdida (NEB), mhux biss billi tirriġenera ż-żoni żvantaġġati tagħha iżda wkoll billi tikkunsidra mill-ġdid it-tifsila tal-belt kollha. 

Il-belt Kapitali Ewropea tal-Kultura tal-2022 hija prova ħajja li, minkejja l-passat industrijali ta’ belt, għad hemm opportunità biex tinbidel f’belt sabiħa, sostenibbli u inklużiva tal-futur.

Esperjenza l-Minett Trail – mhix mogħdija antika kwalunkwe, iżda vjaġġ li jippermettilek tiskopri s-sbuħija ta’ kull sit li tiltaqa’ miegħu permezz ta’ passaġġi tal-ħoss, mixi tar-rakkontar tal-istejjer, installazzjonijiet, wirjiet u kunċerti. Jew żur Belval, sit industrijali antik li issa huwa żona tal-belt b’saħħitha fejn in-nies jaħdmu, jgħixu u jissoċjalizzaw.

Waqt li tkun f’Esch, iċċekkja x’avvenimenti qed iseħħu sabiex ma titlifx kunċert jew wirja. Jew għaliex ma tippruvax il-ferrovija żgħira ta’ Lankelz, jew tipprova xi ħaġa fl-itwal triq tax-xiri fil-Lussemburgu? 

Il-kapitali tar-reġjun ta’ Lorraine, Nancy hija famuża għall-arkitettura tagħha tas-seklu 18 inkluża fil-lista tal-UNESCO, inklużi Place Stanislas, Place de la Carrière u Place d’Alliance. Iżda tiġbor fiha wkoll żviluppi ta’ arkitettura innovattivi u sostenibbli li ħolqu ambjent urban modern.

Eżempju ambizzjuż huwa l-proġett tal-Kampus tal-Innovazzjoni fil-Communauté de Communes du Bassin de Pompey – 20 minuta minn Nancy bil-ferrovija. Bħala sit għall-kreattività, it-taħriġ, l-intraprenditorija, u l-avvenimenti kulturali u soċjali, il-proġett kien wieħed minn 20 inkluż fl-Inizjattivi Lokali tal-Bauhaus Ewropea l-Ġdida tal-2022 għat-taħlita unika tiegħu ta’ sbuħija, disinn u inklużività.

Jekk tixtieq tesperjenza dan kollu f’Nancy stess, iċċekkja l-laboratorji fil-beraħ tagħha, rebbieħa ta’ premjijiet, li huma mifruxa fil-parks tal-belt, u żur il-ġnien botaniku f’Le Montet. Jew erħilha għad-distrett ta’ Meurthe-Canal u agħti daqqa t’għajn lill-isforzi ta’ riġenerazzjoni urbana ta’ suċċess, li wasslu biex il-fabbriki, l-imħażen u bini ieħor jerġgħu jieħdu l-ħajja, u b’hekk saru jospitaw kull tip ta’ attività kulturali u kummerċjali.

Waqt li tkun hemm, tinsiex iżżur Villa Majorelle, wieħed mill-ewwel u l-aktar eżempji influwenti tal-Art Nouveau fi Franza. Imbagħad, mur sal-marina u l-ġonna tal-ilma tagħha, jew duq it-togħma tal-kejkijiet lokali tal-bergamot u l-macarons ta’ Place Stanislas.

Heidelberg, meqjusa minn ħafna bħala waħda mill-aktar bliet sbieħ fil-Ġermanja, tinsab fuq quddiem nett tal-mewġa ta’ innovazzjoni tal-Bauhaus Ewropea l-Ġdida (NEB). Il-Villaġġ ta’ Heidelberg huwa l-akbar kumpless ta’ akkomodazzjoni passiva fid-dinja. Il-villaġġ affordabbli, komdu u ekoloġiku huwa mfassal biex ikun “komunità ħajja” għal persuni ta’ kull età, b’aċċess għal spazji ħodor imfassla biex jinkoraġġixxu l-integrazzjoni u l-interazzjoni.

Wara li żżur il-kastell u l-belt l-antika, ara li jkollok ftit ħin xi tqatta’ fid-distrett ta’ Emmertsgrund. Hemmhekk, se ssib wieħed mill-ewwel u l-aktar eżempji famużi ta’ disinn urban ispirat mill-kunċett ta’ “urbanità permezz tad-densità”: mogħdijiet għall-mixi u toroq separati, pjazez spazzjużi, appartamenti moderni u mhux għaljin għall-familji, u trasport pubbliku tajjeb.

Wara dan, ikkunsidra li żżur il-ħabs tal-istudenti, fejn sal-1914, l-istudenti kienu jinżammu taħt arrest għal reati ta’ disklar fil-qofol tal-lejl jew għal diżordni pubbliku. Jew ħu mixja ta’ ispirazzjoni max-Xmara Neckar, u għaddi minn Philosophenweg. Hemmhekk, tista’ żżur il-ġonna li jaqtgħulek nifsek, idduq l-ikel lokali, taqsam il-pont l-antik u – jekk tazzarda – tpoġġi rasek ġewwa l-ħalq tal-Brückenaffe, il-Heidelberg Bridge Monkey.

Merħba fil-post fejn twieled il-moviment tal-Bauhaus oriġinali! Imwaqqfa fl-1919 mill-arkitett pijunier Walter Gropius, l-iskola tal-arti wasslet għal moviment li għadu jidwi permezz tal-Bauhaus Ewropea l-Ġdida (NEB) – u llum għadha tinkorpora l-valuri li jinsabu fl-arkitettura l-ġdida.

Matul il-Festival tal-Bauhaus Ewropea l-Ġdida fl-2022, il-Bauhaus-Universität Weimar ospitat il-Laboratorju ta’ Ideat. Il-laboratorju sar biex jispira u jħeġġeġ lill-individwi jpinġu viżjoni innovattiva, sostenibbli, ġusta u soċjalment inklużiva ta’ spazji ta’ għajxien futuri fl-Ewropa.

Żur il-Bauhaus-Museum Weimar biex tesplora l-aktar kollezzjoni importanti tal-Bauhaus fil-pajjiż, bl-eqdem eżempji tal-ħidma tal-moviment tkun fejn tkun fid-dinja. Imbagħad, erħilha għall-Università Bauhaus u Haus Am Horn – l-unika biċċa arkitettura ddisinjata u mibnija mill-Bauhaus tal-Istat ta’ Weimar fl-1923. Impressjonanti, hux?

Qabel ma titlaq, ħu mixja jew mur waħda bir-rota fil-Park an der Ilm, qabel ma tgawdi lejl f’Wielandplatz jew f’Beethovenplatz. U tinsiex tieħu grogg f’ġieħ il-kisbiet ta’ Gropius!