DiscoverEU — sejħa għall-applikazzjonijiet

Fl-2025, qed niċċelebraw l-40 sena tal-Ftehim ta’ Schengen — il-pedament tal-ivvjaġġar bla fruntieri li ngawdu minnu llum. Bil-pass tad-DiscoverEU tista’ tesperjenza din il-libertà personalment waqt li tesplora l-Ewropa!

Għandek 18-il sena u int resident ta’ wieħed mill-Istati Membri tal-UE jew ta’ pajjiżi terzi assoċjati mal-Erasmus+? Lesti ruħek biex tesplora l-Ewropa!

Meta hu ċ-ċiklu li jmiss?

Bejn it-30 ta’ Ottubru u t-13 ta’ Novembru 2025 (ftuħ u għeluq f’12:00:00, nofsinhar, ħin ta’ Brussell). Meta jasal il-mument, se tidher buttuna “Applika Issa” f’din il-paġna!

X’inhi d-DiscoverEU?

Id-DiscoverEU hi azzjoni tal-programm Erasmus+ li toffrilek l-opportunità li tesplora d-diversità tal-Ewropa, titgħallem dwar il-wirt kulturali u l-istorja tagħha, u tibni kuntatti ma’ nies mill-kontinent kollu.  

Se tiġi offrut pass tal-ivvjaġġar biex tmur minn post għal ieħor bl-aktar mezzi tat-trasport li jirrispettaw l-ambjent, bħat-trenijiet. Modi oħrajn tat-trasport se jkunu permessi f’każijiet speċifiċi, għal persuni li jgħixu fuq gżejjer jew f’żoni remoti.

Se tirċievi wkoll kard tal-iskontijiet tad-DiscoverEU għal ammont kbir ta’ skontijiet fuq l-akkomodazzjoni, il-kultura, l-isport, it-trasport lokali, jew servizzi oħrajn.

Kif taħdem?

Biex tkun eliġibbli, trid:

• tkun twelidt bejn l-1 ta’ Jannar 2007 (inkluż) u l-31 ta’ Diċembru 2007 (inkluż);
• tniżżel in-numru korrett tal-karta tal-identità (ID), tal-passaport, jew tal-karta tar-residenza fil-formola tal-applikazzjoni online;
• tkun ċittadin jew resident* ta’ wieħed mill-pajjiżi li ġejjin:
  • wieħed mill-Istati Membri tal-Unjoni Ewropea inklużi l-Pajjiżi u t-Territorji Extra-Ewropej (PTEE), jew
  • wieħed mill-pajjiżi terzi assoċjati mal-programm tal-Erasmus+: l-Iżlanda, il-Liechtenstein, il-Maċedonja ta’ Fuq, in-Norveġja, is-Serbja, u t-Turkija.
• taċċetta d-dikjarazzjoni tal-formola tal-applikazzjoni.

* Għal aktar informazzjoni ara t-taqsima tar-Regoli “2. Applikanti eliġibbli”

Imbagħad trid tipparteċipa fi kwiżż (sakemm ma tapplikax bħala membru ta’ grupp).

Jekk tintgħażel, tista' tivvjaġġa għal perjodu minimu ta' jum u massimu ta’ 30 jum waqt il-perjodu tal-ivvjaġġar, li huwa ppjanat li jibda fl-1 ta’ Marzu 2026.  It-tmiem tal-perjodu tal-ivvjaġġar se jkun f’Mejju 2027.

Jekk għandek diżabbiltà jew problema ta’ saħħa li tagħmel l-ivvjaġġar tiegħek diffiċli, tirċievi assistenza u appoġġ. Iċċekkja l-FAQ C.10 tagħna biex issir taf aktar.

Nista’ nivvjaġġa ma’ sħabi?

Iva, tista'! Tista’ tmur waħdek jew iżżid sa 4 iħbieb fil-grupp tiegħek jekk tissodisfa l-kundizzjonijiet tal-eliġibbiltà t’hawn fuq. Sħabek jużaw il-kodiċi tal-applikazzjoni tiegħek biex jissottomettu l-applikazzjoni tagħhom. Ara l-FAQs minn B.5 sa B.11 biex issir taf aktar.

Tista’ wkoll tikkombina pjanijiet tal-ivvjaġġar ma’ vjaġġaturi oħrajn tad-DiscoverEU! Il-Grupp tad-’DiscoverEU fuq il-Facebook hu pjattaforma tajba biex tagħmel dan. Ingħaqad mal-Grupp issa biex tiċċettja ma’ parteċipanti oħrajn.

Ladarba tintgħażel, l-Aġenziji Nazzjonali tal-Erasmus+ se jgħinuk tikkonnettja u titgħallem, torganizza laqgħat ta’ qabel it-tluq u Meet-ups mal-vjaġġaturi.

Aqsam l-esperjenzi tiegħek ma’ ħaddieħor

Il-parteċipanti awtomatikament isiru Ambaxxaturi tad-DiscoverEU. Bħala ambaxxatur, aħna nistednuk taqsam l-esperjenzi tal-ivvjaġġar tiegħek fuq il-midja soċjali billi tuża #DiscoverEU. Tista’ anki tiddeċiedi li tagħti preżentazzjoni fl-iskola tiegħek jew fil-komunità lokali tiegħek.

Nixtieq inkun naf aktar!

Interessat fiċ-ċikli preċedenti ta’ applikazzjonijiet? Agħti daqqa t’għajn lejn l-iskedi informattivi tad-DiscoverEU biex taqra aktar dwar l-azzjoni u l-esperjenzi ta’ xi wħud mill-vjaġġaturi żgħażagħ tad-DiscoverEU.

L-Ewropa qed tistenniek. Agħmel l-ewwel pass.     

Video TedX ta’ ispirazzjoni minn Vincent-Immanuel Herr