DiscoverEU — sejħa għall-applikazzjonijiet
Mill-2027, ir-Renju Unit se jissieħeb fil-programm Erasmus+, inkluż id-DiscoverEU.
Għandek 18-il sena u int resident ta’ wieħed mill-Istati Membri tal-UE jew ta’ pajjiżi terzi assoċjati mal-Erasmus+? Lesti ruħek biex tesplora l-Ewropa!
Meta hu ċ-ċiklu li jmiss tal-applikazzjonijiet?
Huwa ppjanat li ċ-ċiklu li jmiss tal-applikazzjonijiet ikun bejn l-1 u l-15 ta’ Ottubru 2026 (jiftaħ u jagħlaq f’12:00:00, nofsinhar, ħin ta’ Brussell). Meta jasal il-mument, se tidher buttuna “Applika Issa” f’din il-paġna!
X’inhi d-DiscoverEU?
Id-DiscoverEU hi azzjoni tal-programm Erasmus+ li toffrilek l-opportunità li tesplora d-diversità tal-Ewropa, titgħallem dwar il-wirt kulturali u l-istorja tagħha, u tibni kuntatti ma’ nies mill-kontinent kollu.
Se tiġi offrut pass tal-ivvjaġġar biex tmur minn post għal ieħor bl-aktar mezzi tat-trasport li jirrispettaw l-ambjent, bħat-trenijiet. Modi oħrajn tat-trasport se jkunu permessi f’każijiet speċifiċi, għal persuni li jgħixu fuq gżejjer jew f’żoni remoti.
Se tirċievi wkoll kard tal-iskontijiet tad-DiscoverEU għal ammont kbir ta’ skontijiet fuq l-akkomodazzjoni, il-kultura, l-isport, it-trasport lokali, jew servizzi oħrajn.
Kif taħdem?
Biex tkun eliġibbli, trid:
- tkun twelidt bejn l-1 ta’ Jannar 2008 (inkluż) u l-31 ta’ Diċembru 2008 (inkluż);
- iddaħħal in-numru tal-karta tal-identità (ID), tal-passaport, jew tal-permess tar-residenza fuq il-formola tal-applikazzjoni online;
- tkun ċittadin jew resident* ta’ wieħed minn dawn il-pajjiżi:
- l-Istati Membri tal-Unjoni Ewropea, inklużi r-reġjuni ultraperiferiċi tagħha, jew
- il-Pajjiżi u t-Territorji Extra-Ewropej (PTEE) assoċjati mal-Unjoni Ewropea, jew
- il-pajjiżi terzi assoċjati mal-programm tal-Erasmus+: l-Iżlanda, il-Liechtenstein, il-Maċedonja ta’ Fuq, in-Norveġja, is-Serbja, u t-Turkija.
- taċċetta d-dikjarazzjoni tal-formola tal-applikazzjoni.
* Għal aktar informazzjoni ara t-taqsima tar-Regoli “2. Applikanti eliġibbli”
Imbagħad, trid tipparteċipa fi kwiżż (il-kap tal-grupp biss f’każ ta’ applikazzjoni ta’ grupp).
Jekk jirnexxilek, tista’ tivvjaġġa sa 7 ijiem f’perjodu massimu ta’ xahar fil-perjodu tal-ivvjaġġar awtorizzat, bejn l-1 ta’ Marzu 2027 u l-31 ta’ Mejju 2028.
Jekk għandek diżabbiltà jew problema ta’ saħħa li tagħmel l-ivvjaġġar tiegħek diffiċli, tirċievi assistenza u appoġġ.
Nista’ nivvjaġġa ma’ sħabi?
Iva, tista'! Tista’ tmur waħdek jew iżżid sa 4 iħbieb fil-grupp tiegħek jekk tissodisfa l-kundizzjonijiet tal-eliġibbiltà t’hawn fuq. Sħabek jużaw il-kodiċi tal-applikazzjoni tiegħek biex jissottomettu l-applikazzjoni tagħhom. Ara l-Mistoqsijiet Frekwenti minn B.5 sa B.11 biex issir taf aktar.
Tista’ wkoll tikkombina pjanijiet tal-ivvjaġġar ma’ vjaġġaturi oħrajn tad-DiscoverEU! Il-Grupp tad-DiscoverEU fuq il-Facebook jista’ jservi ta’ pjattaforma tajba biex tagħmel dan jekk tagħti l-kunsens tiegħek biex isir użu minn din il-midja soċjali*. Ingħaqad mal-Grupp issa biex tiċċettja ma’ parteċipanti oħrajn.
Ladarba tintgħażel, l-Aġenziji Nazzjonali tal-Erasmus+ se jgħinuk tikkonnettja u titgħallem, torganizza laqgħat ta’ qabel it-tluq u Meet-ups mal-vjaġġaturi.
* L-ipproċessar tad-data personali jaqa’ fl-ambitu ta’ Kundizzjonijiet tal-Protezzjoni tad-Data separati u tal-istqarrija ta’ privatezza speċifika tal-Facebook, li jaġixxi bħala kontrollur tad-data separat.
Aqsam l-esperjenzi tiegħek ma’ ħaddieħor
Il-parteċipanti awtomatikament isiru Ambaxxaturi tad-DiscoverEU. Bħala ambaxxatur, aħna nistednuk taqsam l-esperjenzi tal-ivvjaġġar tiegħek fuq il-midja soċjali billi tuża #DiscoverEU. Tista’ anki tiddeċiedi li tagħti preżentazzjoni fl-iskola tiegħek jew fil-komunità lokali tiegħek.
Nixtieq inkun naf aktar!
Interessat fiċ-ċikli preċedenti ta’ applikazzjonijiet? Agħti daqqa t’għajn lejn l-iskedi informattivi tad-DiscoverEU biex taqra aktar dwar l-azzjoni u l-esperjenzi ta’ xi wħud mill-vjaġġaturi żgħażagħ tad-DiscoverEU.
L-Ewropa qed tistenniek. Agħmel l-ewwel pass.
Video TedX ta’ ispirazzjoni minn Vincent-Immanuel Herr