DiscoverEU - glao ar iarratais

Cad é DiscoverEU?

Is gníomhaíocht de chuid chlár Erasmus+ é DiscoverEU a thugann deis duit taisteal agus eolas a chur ar éagsúlacht na hEorpa, foghlaim faoina hoidhreacht chultúrtha agus a stair, agus nascadh le daoine ó gach cearn den mhór-roinn.  

Tairgfear pas taistil duit chun bogadh thart ar na modhanna iompair is neamhdhíobhálaí don chomhshaol, cuir i gcás traenacha. Ceadófar modhanna iompair eile i gcásanna sonracha, do dhaoine atá ina gcónaí ar oileáin nó i gceantair iargúlta.

Gheobhaidh tú cárta lascaine DiscoverEU freisin le haghaidh lear mór lascainí ar lóistín, imeachtaí cultúir, imeachtaí spóirt, iompar áitiúil, nó seirbhísí eile.

Cén chaoi a n-oibríonn sé?

Beidh tú incháilithe más rud é:

• gur rugadh thú idir an 1 Eanáir 2008 agus an 31 Nollaig 2008, na dátaí sin san áireamh;
• go líonann tú isteach an uimhir aitheantais (ID), uimhir phas nó uimhir an cheada cónaithe ar an bhfoirm iarratais ar líne;
• go bhfuil tú i do shaoránach nó i do chónaitheoir* de chuid ceann díobh seo a leanas:
  • Ballstát den Aontas Eorpach, i réigiúin is forimeallaí an Aontais san áireamh, nó
  • tíortha agus Críocha Thar Lear atá bainteach leis an Aontas Eorpach, nó
  • na tríú tíortha a bhfuil baint acu le clár Erasmus+: an Íoslainn, Lichtinstéin, an Mhacadóin Thuaidh, an Iorua, an tSeirbia agus an Tuirc.
• go n-aontaíonn tú le dearbhú na foirme iarratais.

* Le haghaidh tuilleadh eolais, féach na Rialacha, roinn ‘2. Iarratasóirí incháilithe’

Ansin beidh ort páirt a ghlacadh i quiz (ceannaire an ghrúpa amháin i gcás iarratas grúpa).

Má éiríonn leat, is féidir leat taisteal ar feadh tréimhse suas le 7 lá laistigh de thréimhse aon mhí amháin ar a mhéad le linn na tréimhse taistil údaraithe ón 1 Márta 2027 go dtí an 31 Bealtaine 2028. 

Má tá míchumas ort nó má tá fadhb shláinte agat a fhágann go mbeidh an taisteal dúshlánach duit, gheobhaidh tú cúnamh agus tacaíocht. 

'Conas iarratas a dhéanamh ar DiscoverEU? Rang teagaisc céim ar chéim.' D'fhéadfadh sé nach léireodh an rang teagaisc seo go hiomlán an leagan is déanaí den fhoirm iarratais. Tá luach táscach amháin aige (lena n-áirítear an físeán, guthú nó fotheidil). I gcás ar bith, ba cheart d’iarratasóirí ceanglais fhoirm iarratais an bhabhta DiscoverEU a bhfuil siad ag cur isteach air a leanúint.

An féidir liom taisteal le mo chairde?

Is féidir é sin a dhéanamh! Is féidir leat taisteal i d’aonar freisin, nó suas le ceathrar cairde a chur le do ghrúpa ar choinníoll go gcomhlíonann siad na coinníollacha incháilitheachta thuas. Bainfidh siad úsáid as do chód iarratais nuair a chuireann siad féin isteach ar an tionscnamh. Féach ar B.5 go B.11 sna Ceisteanna Coitianta le haghaidh tuilleadh eolais.

Is féidir leat pleananna taistil a nascadh le taistealaithe eile DiscoverEU! D’fhéadfadh Grúpa Facebook DiscoverEU cabhrú leat chun é sin a dhéanamh má thoilleann tú úsáid a bhaint as an ardán sin ar na meáin shóisialta*. Glac páirt sa Ghrúpa anois chun comhrá a dhéanamh le rannpháirtithe eile.

A luaithe a roghnófar thú, cuideoidh Gníomhaireachtaí Náisiúnta Erasmus+ leat nascadh agus foghlaim trí chruinnithe réamhimeachta a eagrú agus taistealaithe a thabhairt le chéile sula n-imíonn siad.

* Tagann próiseáil sonraí pearsanta faoi Choinníollacha Cosanta Sonraí ar leithligh agus faoi ráiteas príobháideachais sonrach Facebook, a fheidhmíonn mar rialaitheoir sonraí ar leithligh.

Taithí a chomhroinnt

Is Ambasadóirí DiscoverEU iad na rannpháirtithe go huathoibríoch. Agus tú i d’Ambasadóir, iarrfar ort do thaithí taistil a chomhroinnt ar na meáin shóisialta agus an haischlib #DiscoverEU a úsáid. Is féidir leat fiú cur i láthair a dhéanamh i do scoil nó sa cheantar ina bhfuil cónaí ort.

An bhfuil tuilleadh eolais uait?

An bhfuil suim agat sna babhtaí iarratais a bhí ann cheana? Má tá, léigh bileoga eolais DiscoverEU, ina bhfuil tuilleadh sonraí faoin ngníomhaíocht agus faoin dóigh ar éirigh le roinnt daoine óga a chuaigh ag taisteal faoi DiscoverEU.