Finnland, með sínum 188 000 vötnum og 3 milljónum sánum, er land þar sem fólkið skilur gildi þess að vera í snertingu við vatn. Tampere, sem staðsett er á Vesturvatnasvæði Finnlands, er milli tveggja stórra vatna, Näsijärvi og Pyhäjärvi, og það eru yfir hundrað fleiri innan borgarmarka. Við næstum öll vötn er hægt að finna stað til að synda. Ef þú ert hugrakkur, þá geturðu reynt avanto (vetrarsund), hefðbundna finnska útivistarhreyfingu sem hefur verið stunduð að minnsta kosti frá 17. öld. Ef þú ákveður að láta vaða, hví ekki þá að tvinna saman íssund og heita sánuheimsókn á staðnum? Í Tampere, er Rauhis sána þægilega staðsett nálægt baðströnd og miðbænum.

Árið 2023, var Tartu gestgjafi Norðurlandameistaramótsins í sundi, þar sem sundmenn komu hvaðanæva að úr héraðinu. Mótið var haldið í Aura-vatnsgarðinum, sem er opinn almenningi svo hann geti séð sundlaugina og sánuna. Ef þú vilt frekar synda úti, þá hefur Tartu frábæra sundstaði innanbæjar, þangað sem heimamenn elska að fara og kæla sig í á sumrin. Einn sá þekktasti er ströndin við Verevi-vatnið, eða þú getur fundið þinn eigin uppáhaldsstað. Fyrirferðalítil stærð borgarinnar auðveldar að komast á milli staða gangandi og sjá merkisstaði borgarinnar, eins og Eistneska þjóðarsafnið. Árið 2020 fékk borgin sérstaka umsögn vegna Aðgengisborgar-verðlaunanna og Tartu er einnig Evrópsk menningarhöfuðborg 2024.

Lokaðu augunum og láttu þig dreyma um fullkomna strönd. Hvað sérðu? Fínan, hvítan sand og hreint vatn? Leyfðu mér að kynna þig fyrir Liepāja-ströndinni, vinsælum sundstað síðan um 1860 og Bláfánaströnd, sem þýðir að hún hefur náð ströngum kröfum vegna gæða umhverfis og vatns. Ekki missa af heimsókn til Liepāja-vatnsins, sem er Natura 2000 varið svæði með varp- og farfuglum og 1 km löngum göngustíg. Eða ef þú ert í ævintýraleit, kíktu þá á Karosta, fyrrum herfangelsi og það eina sem opið er ferðafólki í Evrópu. Þú munt sjá að fangelsið er að mestu óbreytt frá tímum Rússakeisara, getur séð klefana og heyrt skuggalegar sögur af lífinu í fangelsinu.

Klaipėda er staðsett á kurónska tanganum, 98 km löngum, þunnum, hvelfdum sandöldutanga sem aðgreinir kurónska lónið frá Eystrasalti. Vegna einstaks landslags sands og trjáa hefur staðurinn fengið stöðu á heimsminjastaðalista UNESCO. Það er fjöldi baðstranda í nágrenninu þar sem hægt er að fara í sólbað, synda eða hendast í náttúruna. Smiltynė, sem aðeins er hægt komast til með ferju, er ein sú besta. Í borginni Klaipėda má finna Litháíska sjávarsafnið, sem hefur að geyma 24 fiskabúr sem sýna 4 mismunandi vistkerfi (ferskvatn-, Eystrarsalts-, Norðursjávar- og hitabeltisvatnskerfi).

Það er sagt að Afródíte hafi fæðst nálægt Paphos. Það er viðeigandi staður fyrir fegurðargyðjuna, með sínar fullkomnu strendur og hreint vatn - Kýpur er með einhver bestu vatnsgæðin í Evrópu. Eða ef þú vilt frekar halda þig á þurru landi, þá er dásamleg strandargönguleið nærri Paphos eða þú getur skoðað Akamas-þjóðgarðinn, þar á meðal Avakas-gljúfrið sem er þekkt fyrir fjölbreytni planta og fugla. Svæðið nálægt Paphos er líka ríkt af fornfræðilegum heimsminjastöðum af lista UNESCO og Paphos var Evrópsk menningarhöfuðborg 2017.