Bejn l-1927 u l-1933, Turku saret il-post tat-twelid tal-moviment Funzjonalist tal-arkitettura. Il-persunaġġ ewlieni tagħha, Alvar Aalto, iddiżinja 3 binjiet f’Turku li huma meqjusin bħala eżempji ewlenin ta’ dan l-istil: il-Maalaistentalo, it-Turun Sanomat, u s-Seurahuone. Turku impenjat ruħha li tiżgura li bħala belt tkun tista’ titgawda minn kulħadd, u dan wassal biex hi tiġi nominata bħala r-runner up tal-Premju Access City fl-2011.
Turku hi magħrufa ukoll bħala l-kapital tal-ikel tal-Finlandja minħabba l-kultura vibranti tar-ristoranti tagħha u s-suq tal-ħut storikament famuż tagħha. 
 

Helsinki hi ġawhra għad-dilettanti tal-arkitettura. Il-belt tospita waħda mill-akbar kollezzjonijiet ta’ bini Art Nouveau fit-Tramuntana tal-Ewropa, flimkien ma’ firxa wiesgħa ta’ stili arkitettorali bħal dak Modernist u dak tal-Funzjonaliżmu. Il-postijiet fejn wieħed jista’ jara jinkludu l-Knisja ta’ Temppeliaukio bl-istruttura taħt l-art tagħha skavata direttament minn blat solidu u l-Pjazza tas-Senat bil-kollezzjoni tagħha ta’ 4 binjiet Neoklassiċi mfasslin mill-perit Ġermaniż Carl Ludvig Engel. Il-belt hi faċli għal kulħadd biex jesplora, kif rifless fl-istatus tagħha ta’ runner-up fl-Access City Award 2022.
Fuq il-kosta ta’ Helsinki tinsab il-Fortizza tal-Baħar ta’ Suomenlinna, Sit ta’ Patrimonju Dinji tal-UNESCO, li hi eżempju ewlieni tal-arkitettura militari Ewropea. Madwar l-ilma jinsab il-Mużew għall-Arja Aperta ta’ Seurasaari, li jipprovdi stampa tal-ħajja tradizzjonali Finlandiża.
 

It-tieni l-akbar belt tal-Estonja, Tartu hi magħrufa għall-atmosfera bohemjana tagħha u bħala l-mutur ewlieni tal-progress xjentifiku Estonjan. L-arkitettura tagħha, b’mod partikolari fil-Belt l-Antika protetta mill-patrimonju, hi primarjament iddisinjata bi stil Klassiku. Fl-2015, l-Ensemble Storiku tal-Università ta’ Tartu ngħata ċ-Ċertifikat tal-Patrimonju Ewropew għall-arkitettura impressjonanti tiegħu tas-seklu 19 li tirrifletti t-tradizzjoni Ewropea fl-edukazzjoni. Il-belt se jkollha t-titlu tal-Kapitali Ewropea tal-Kultura fl-2024, u l-isforzi tagħha biex issib soluzzjonijiet prattiċi għar-residenti u l-viżitaturi bi problemi ta’ mobbiltà u aċċessibbiltà kisbulha t-titlu ta’ runner up fil-Premju Access City 2020. Titlifx l-Aparaaditehas (il-Fabbrika Widget), kumpless ta’ fabbrika qadim ittrasformat mill-2014 f’ċentru kulturali, jew il-Mużew Nazzjonali Estonjan.   

Valga hi belt fin-Nofsinhar tal-Estonja, fuq il-fruntiera mal-Latvja. Il-belt, li nbniet bejn l-1864 u l-1866, hi waħda mill-aktar eżempji eċċezzjonali tal-arkitettura tal-injam tal-Klassiċiżmu Tardiv fl-Estonja. Waqt li tkun hemm, żur il-Mużew ta’ Valga; il-binja tiegħu tmur lura għall-1911 u hi eżempju ta’ Art Nouveau tardiv. Il-faċċata impressjonanti tagħha hi protetta bis-saħħa tal-konservazzjoni tal-patrimonju.
Mill-quċċata tal-Għolja Väike Munamägi tista’ tara l-pjazza ċentrali li hi maqsuma bejn Valga fl-Estonja u Valka fil-Latvja – nofsha f’pajjiż u nofsha f’ieħor.
 

Riga għandha kollezzjoni ta’ madwar 800 binja Art Nouveau, li jagħmilha l-belt bl-ogħla konċentrazzjoni ta’ arkitettura Art Nouveau fid-dinja. Ta’ interess partikolari huma ċ-ċentru storiku tagħha, Sit ta’ Patrimonju Dinji tal-UNESCO mill-1997 u t-Tliet Aħwa Subien, l-eqdem kumpless tad-djar f’Riga. Dawn huma eżempji tajbin ta’ preservazzjoni storika Latvjana, filosofija li bdiet fil-Latvja matul il-perjodu bejn il-gwerer. Illum, it-Tliet Aħwa Subien tant huma kulturalment sinifikanti fil-belt li ngħataw Ċertifikat tal-Patrimonju Ewropew. 
Tħoss li għandek tnaqqar xi ħaġa? Ieqaf fis-Suq Ċentrali – wieħed mill-akbar fl-Ewropa – u pprova xi delikatezzi lokali bħall-ħut iffumigat. Fil-belt l-antika, żur l-iskultura stramba tal-Mużiċisti tal-Belt ta’ Bremen b’erba’ annimali, ibbażata fuq il-ħrafa legendarja tal-Aħwa Grimm.
 

Il-landscape arkitettorali ta’ Daugavpils hi distinta minħabba l-abbundanza tagħha ta’ bini bi bricks ħomor, li ħafna minnhom huma ddisinjati mill-arkitett ewlieni tal-belt Willem Neumann. Fuq l-Għolja tal-Knisja, se ssib erba’ knejjes weqfin maġenb xulxin, kull waħda tirrappreżenta l-erba’ denominazzjonijiet reliġjużi ewlenin fir-reġjun ta’ Latgale tal-Latvja. Flimkien jiffurmaw ġabra arkitettorali impressjonanti.

Iċ-Ċentru tal-Arti Mark Rothko, li jinsab fl-armerija storika tal-Fortezza ta’ Daugavpils, hu l-uniku mużew fl-Ewropa tal-Lvant fejn tista’ ssib ix-xogħlijiet oriġinali tal-pittur.

Rikka fil-kultura, Kaunas rebħet iċ-Ċertifikat tal-Patrimonju Ewropew fl-2014 bis-saħħa ta’ 44 binja li jirrappreżentaw l-arkitettura tagħha ta’ bejn il-gwerer 1919-1940. Hi rċeviet ukoll Premju tal-Patrimonju Ewropew għar-restawr tal-Kabinett l-Antik tal-Ministri tagħha u t-titlu City of Design tal-UNESCO 2017. Kaunas hi wkoll waħda mit-tliet Kapitali Ewropej tal-Kultura 2022.
Storikament, il-belt kienet wieħed miċ-ċentri tal-patrimonju Lhudi fl-Ewropa, bil-Lhud jammontaw għal sa 40% tal-popolazzjoni tal-belt fl-1908. Illum, dan il-patrimonju jidher fis-Sinagoga ta’ Kaunas, il-Mużew tal-Belt ta’ Kaunas u l-Mużew Vilna Gaon tal-Istorja Lhudija.
Jekk qed tfittex mużew li m'hawnx bħalu, tinsab fil-post it-tajjeb. Żur il-Mużew tax-Xitan, li fih aktar minn 2,000 rappreżentazzjoni tax-xitan mid-dinja kollha. 
 

Żjara lil Klaipėda qatt mhi tedjanti, b’avvenimenti annwali bħar-Rebbiegħa tal-Mużika ta’ Klaipėda, il-Festival ta’ Jazz tal-Kastell ta’ Klaipėda u l-Festival Internazzjonali tat-Teatru tat-Triq. Minħabba l-istorja Ġermaniża tagħha, għandha stil arkitettorali distint ikkaratterizzat minn bini bi gwarniċ tal-injam.
Klaipėda hi belt kostali u l-uniku port marittimu ewlieni tal-Litwanja. Biex tesperjenza l-atmosfera marittima, ipprova ftit Kepta Duona, ħobż iswed moqli tal-Baltiku, abbord il-bastiment Meridianas.