Il-Koordinatur tal-UE għaż-Żgħażagħ

L-irwol tal-Koordinatur tal-UE għaż-Żgħażagħ 

Il-Kummissjoni Ewropea pproponiet li jinħoloq l-irwol tal-Koordinatur tal-UE għaż-Żgħażagħ bl-għan li tissaħħaħ il-kooperazzjoni transsettorjali, kif ukoll biex fi ħdan il-Kummissjoni Ewropea jiġi żviluppat l-għarfien u jkun hemm skambju dwar kwistjonijiet li jolqtu liż-żgħażagħ.

Il-Kunsill laqa’ bi pjaċir din l-intenzjoni fir-Riżoluzzjoni tal-Kunsill dwar l-Istrateġija tal-UE dwar iż-Żgħażagħ 2019–2027, filwaqt li nnota li l-Koordinatur tal-UE għaż-Żgħażagħ għandu jaħdem id f’id ma’ diversi partijiet ikkonċernati biex jiżgura li jkun hemm komunikazzjoni koerenti maż-żgħażagħ.

Fil-konklużjonijiet tiegħu tad-29 ta’ Novembru 2023 il-Kunsill ippromwova l-integrazzjoni tad-dimensjoni taż-żgħażagħ fil-proċessi tat-teħid tad-deċiżjonijiet dwar il-politiki fl-Unjoni Ewropea. Huwa stieden lill-Kummissjoni Ewropea biex tiżgura “l-integrazzjoni ta’ perspettiva taż-żgħażagħ fit-tfassil, l-implimentazzjoni, il-monitoraġġ u l-evalwazzjoni tal-politika, bl-applikazzjoni ta’ dik il-fehma għall-oqsma kollha li jaffettwaw il-ħajja taż-żgħażagħ, bl-involviment, kif xieraq fil-livell tal-UE, tal-Koordinatur tal-UE għaż-Żgħażagħ.”

X’jagħmel il-Koordinatur tal-UE għaż-Żgħażagħ?

Il-Koordinatur tal-UE għaż-Żgħażagħ jiffaċilita n-network tal-Kummissjoni għaż-żgħażagħ magħmul minn korrispondenti taż-żgħażagħ minn kull parti tal-Kummissjoni u jippresiedi l-grupp tal-partijiet ikkonċernati taż-żgħażagħ tal-UE. 

Il-Koordinatur:

• jinkoraġġixxi l-integrazzjoni tal-perspettivi taż-żgħażagħ (inkluż il-kontribut riċevut permezz tad-Djalogu tal-UE maż-Żgħażagħ) fil-politiki rilevanti kollha,
• isaħħaħ il-kooperazzjoni u l-koordinazzjoni bejn is-servizzi tal-Kummissjoni li jaħdmu fuq kwistjonijiet li jolqtu liż-żgħażagħ, u
• jara li ż-żgħażagħ ikunu jafu dwar x’opportunitajiet toffrilhom l-UE.  

Eżempji ta’ attivitajiet tal-Koordinatur tal-UE għaż-Żgħażagħ

Biliana Sirakova nħatret bħala l-ewwel Koordinatur tal-UE għaż-Żgħażagħ f’Ġunju 2021. 

Djalogu ta’ politika maż-żgħażagħ mal-Kummissarju Iliana Ivanova matul il-Ġimgħa Ewropea taż-Żgħażagħ 2024, immoderat mill-Koordinatur għaż-Żgħażagħ Biliana Sirakova. © L-Unjoni Ewropea, 2024

Din hija lista mhux kompluta tal-attivitajiet tas-Sa Sirakova:  

2025

• Mexxiet it-tnedija tal-Grupp tal-Partijiet Ikkonċernati tal-UE fil-Qasam taż-Żgħażagħ u ppresidiet il-laqgħat tiegħu (l-ewwel laqgħa fi Brussell, il-laqgħa tat-8 ta’ Lulju)
• Mexxiet il-varar tal-proċess tal-verifika taż-żgħażagħ fil-Kummissjoni Ewropea
• Irrappreżentat lill-Kummissjoni fil-Konferenzi tal-UE dwar iż-Żgħażagħ f’Lublin u f’Copenhagen
• Għamlet aktar minn 60 attività ta’ kuntatt mal-pubbliku (diskorsi waqt avvenimenti, laqgħat maż-żgħażagħ u mas-soċjetà ċivili taż-żgħażagħ, intervisti, eċċ.)
• Tat preżentazzjoni lil rappreżentanti mill-ministeri tas-saħħa, tax-xogħol, u tal-affarijiet soċjali fis-sessjoni ta’ ħidma tat-TAIEX (Assistenza Teknika u Skambju ta’ Informazzjoni) dwar it-tema tal-benesseri u s-saħħa mentali tat-tfal u taż-żgħażagħ bħala l-ogħla prijorità
• Tat preżentazzjoni dwar l-involviment taż-żgħażagħ u l-politika dwar iż-żgħażagħ lill-ministeri f’laqgħa tal-grupp ta’ tmexxija għall-koeżjoni soċjali tal-Istrateġija tal-UE għar-Reġjun Adrijatiku u Jonju (EUSAIR)
• Kienet kelliema ewlenija fil-programm ta’ leadership Europe 101 online għaż-żgħażagħ
• Immoderat id-djalogu ta’ politika maż-żgħażagħ, mal-Kummissarju Jørgensen: Insawru futur nadif, sostenibbli, u ġust fil-qasam tal-enerġija
• Għamlet id-diskors tal-għeluq tal-Your Europe, Your Say! 2025, l-avveniment ewlieni tal-KESE għaż-żgħażagħ
• Tkellmet f’seminar dwar l-attiviżmu fl-UE organizzat mill-Unjoni Ewropea tal-Istudenti Lhud (EUJS, European Union of Jewish Students)
• Ikkontribwiet għall-proċess ta’ kokreazzjoni tal-istrateġija l-ġdida dwar l-ekwità interġenerazzjonali

2024 

• Tat pariri lid-DĠ u lis-servizzi dwar kwistjonijiet relatati mal-politika dwar iż-żgħażagħ u dwar l-istabbiliment ta’ azzjonijiet biex jiġu involuti ż-żgħażagħ, u poġġiethom f’kuntatt mal-partijiet ikkonċernati mill-interessi taż-żgħażagħ (eż. lid-DĠ ENER/CINEA dwar l-istabbiliment tan-network tal-Ambaxxaturi Żgħażagħ tal-Enerġija, lill-Aġenzija għad-Drittijiet Fundamentali dwar l-istabbiliment ta’ grupp konsultattiv dwar iż-żgħażagħ)
• Mexxiet it-twaqqif tan-network il-ġdid tal-Kummissjoni għaż-żgħażagħ, magħmul minn korrispondenti taż-żgħażagħ
• Mexxiet it-tħejjija u t-twaqqif tal-grupp il-ġdid tal-partijiet ikkonċernati taż-żgħażagħ tal-UE
• Mexxiet l-istabbiliment tal-proċess il-ġdid tal-verifika taż-żgħażagħ fil-Kummissjoni Ewropea
• Għamlet 88 attività ta’ kuntatt man-nies u ta’ komunikazzjoni (inklużi diskorsi f’konferenzi, avvenimenti, u panels, kif ukoll sessjonijiet ta’ ħidma u preżentazzjonijiet liż-żgħażagħ u lill-organizzazzjonijiet taż-żgħażagħ)
• Irrappreżentat lill-Kummissjoni f’seminar tal-esperti dwar l-aġendi politiċi Ewropej u internazzjonali dwar it-tfal, iż-żgħażagħ, u d-drittijiet tat-tfal u fil-Konferenza tal-UE dwar iż-Żgħażagħ f’Ghent, organizzata mill-Presidenza Belġjana tal-Kunsill tal-UE; fis-seminar dwar id-djalogu tal-UE maż-żgħażagħ fil-Presidenza Ungeriża u fis-sessjoni plenarja ta’ Mejju tal-KESE f’dibattitu dwar “Leħen iż-żgħażagħ għall-għażliet tal-UE”
• Kienet membru tal-panel meta ġie ppreżentat l-istudju dwar il-politiki “From Posts to Polls” mill-Friedrich-Ebert-Stiftung (FES)
• Immoderat id-djalogu ta’ politika maż-żgħażagħ mal-Kummissarju Ivanova bit-tema “European Degree and Learning mobility” (reġistrazzjoni)
• Ikkontribwiet għall-Ġimgħa Ewropea taż-Żgħażagħ 2024 u kienet membru tal-panel fis-sessjoni tal-Kumitat tar-Reġjuni dwar “Iż-żgħażagħ u d-demokrazija”
• Ikkontribwiet għal pubblikazzjoni dwar l-integrazzjoni tad-dimensjoni taż-żgħażagħ

2023

• Mexxiet it-tħejjija tal-Komunikazzjoni tal-Kummissjoni dwar is-Sena Ewropea taż-Żgħażagħ
• Ipprovdiet għarfien politiku espert u superviżjoni fl-evalwazzjoni tar-riżultati tas-Sena Ewropea taż-Żgħażagħ
• Għamlet aktar minn 100 attività ta’ kuntatt man-nies. Eżempji: 2023 Your Europe, Your Say, intervista ma’ Radio Romania International, is-seminar annwali bejn l-UE u l-Istati Uniti għall-mexxejja żgħażagħ, diskussjoni f’ċirku online dwar “Policy making for all”, il-konferenza tal-UNDP dwar il-Garanzija għaż-Żgħażagħ  
• Organizzat u ppresediet żewġ laqgħat tan-network tal-Kummissjoni għaż-żgħażagħ u żewġ laqgħat tal-grupp tal-koordinaturi nazzjonali u tal-partijiet ikkonċernati tas-Sena Ewropea taż-Żgħażagħ
• Immoderat ħames djalogi ta’ politika maż-żgħażagħ mal-Kummissarji
• Irrappreżentat lill-Kummissjoni fl-avveniment li jħalli legat dwar l-integrazzjoni tad-dimensjoni taż-żgħażagħ, organizzat mill-Presidenza Żvediża tal-Kunsill tal-UE
• Għamlet filmat b’messaġġ għall-MOOC dwar l-elementi essenzjali tal-politika dwar iż-żgħażagħ
• Tkellmet u ħadet sehem fil-konferenza tal-UE dwar iż-żgħażagħ f’Alicante, organizzata mill-Presidenza Spanjola tal-Kunsill tal-UE 

2022 

• Għamlet aktar minn 150 attività ta’ kuntatt mal-pubbliku (diskorsi f’konferenzi, laqgħat maż-żgħażagħ u mal-partijiet ikkonċernati, podcasts, intervisti, filmati). Eżempji: podcast mal-Eurodesk, sessjoni online mal-Institute for a Greater Europe, filmat b’messaġġ għall-konferenza annwali tal-Housing Europe f’Ħelsinki, webinar li organizzawh flimkien il-Kummissjoni Ewropea, il-Eurofound, u l-Organizzazzjoni Internazzjonali tax-Xogħol, il-konferenza tal-Youth in the Northen Periphery and Arctic, Jum l-Inizjattiva taċ-Ċittadini Ewropej
• Mexxiet it-tħejjija u ppresediet 5 laqgħat tan-network tal-Kummissjoni għaż-żgħażagħ u 11-il laqgħa tal-grupp tal-koordinaturi nazzjonali u tal-partijiet ikkonċernati tas-Sena Ewropea taż-Żgħażagħ
• Immoderat 9 djalogi ta’ politika maż-żgħażagħ mal-Kummissarji

Settembru – Diċembru 2021

• Kienet waħda minn dawk li mexxew il-gruppi fit-task force tas-Sena Ewropea taż-Żgħażagħ 2022 li kienet responsabbli għall-involviment tal-koordinaturi nazzjonali u tal-partijiet ikkonċernati mill-interessi taż-żgħażagħ u għall-inizjattivi ta’ kuntatt man-nies esternament u internament fil-Kummissjoni
• Stabbiliet network informali tal-Kummissjoni għaż-żgħażagħ b’rappreżentanti minn 15-il Direttorat Ġenerali
• Kellha aktar minn 80 attività ta’ kuntatt man-nies u ta’ komunikazzjoni, diskorsi, u intervisti. Eżempji: diskors online dwar il-parteċipazzjoni taż-żgħażagħ għall-iSchwarzkopf-Stiftung Junges Europa, preżentazzjoni fl-ALL DIGITAL SUMMIT Social Hackademy, intervista f’Bundesregierung.de, intervista f’fse.gouv.fr, mistiedna fil-podcast “Under 30” tas-Sħubija taż-Żgħażagħ bejn l-UE u l-Kunsill tal-Ewropa
• Għamlet filmat b’messaġġ għat-taħriġ online ġenerali tal-Korp Ewropew ta’ Solidarjetà.

Il-Kummissarju Marya Gabriel (lemin) u l-Koordinatur għaż-Żgħażagħ Biliana Sirakova © L-Unjoni Ewropea, 2021