Na cineálacha tionscadail a reáchtáiltear faoi chuimsiú an Chóir Dlúthpháirtíochta Eorpaigh
Tugtar sa liosta seo na cineálacha tionscadail is féidir a reáchtáil faoi chuimsiú an Chóir Dlúthpháirtíochta Eorpaigh. Ní thugtar gach saghas tionscadail sa liosta, agus is féidir go leasófar an liosta de réir mar a thiocfaidh forbairt ar an gCór.
Cuimsiú
Réimse leathan é seo a chuimsíonn nithe ar nós obair a dhéanamh le daoine atá faoi mhíchumas nó le daoine a bhfuil riachtanais speisialta acu, an t-idirdhealú agus an éadulaingt a chomhrac, obair a dhéanamh le grúpaí mionlaigh ar nós na Romach, agus saincheisteanna a bhíonn i dtreis ó chultúr go chéile, ó reiligiún go chéile agus ó ghlúin go chéile.
Dídeanaithe agus imircigh a ghlacadh agus a imeascadh
Cúnamh a thabhairt fáilte a chur roimh dhaoine atá tar éis an Eoraip a bhaint amach, agus cuidiú leo imeascadh i bpobail ar fud na hEorpa.
Saoránacht agus rannpháirtíocht dhaonlathach
Is féidir tionscadail a bhaineann le cearta an duine agus saincheisteanna dlí a bheith i gceist leis seo, agus tionscadail atá ceaptha cúnamh a thabhairt do dhaoine feabhas a chur ar an tuiscint atá acu ar oibriú an daonlathais agus ar lucht déanta cinntí agus ar an gciall atá acu don dá rud sin.
Tubaistí a chosc agus téarnamh ó thubaistí
Tionscadail atá ceaptha cúnamh a thabhairt contúirtí a sheachaint a bhaineann le tubaistí nádúrtha agus a bhfuil eolas orthu, agus cuidiú le pobail téarnamh ó thubaistí nádúrtha. Féach nach n-iarrfar ar rannpháirtithe i dtionscnamh an Chóir Dlúthpháirtíochta Eorpaigh aon seirbhísí práinnfhreagartha ar thubaistí a sholáthar. Daoine a bhfuil sainoiliúint faighte acu agus a bhfuil taithí acu ar a leithéid a dhéanamh go sábháilte i ndálaí contúirteacha, agus iad sin amháin, a dhéanann cúraimí den saghas sin.
An comhshaoil agus cosaint an chomhshaoil
Tionscadail a bhaineann leis an athrú aeráide, le fuinneamh agus le hacmhainní nádúrtha, agus le réimsí a bhfuil gaol acu le chéile, e.g. An talmhaíocht, an fhoraoiseacht agus an t-iascach.
Sláinte agus folláine
Tionscadail atá ceaptha sláinte agus folláine daoine a chur chun cinn, cuir i gcás beatha shláintiúil a chaitheamh agus an t-aosú gníomhach.
Oideachas agus oiliúint
D’fhéadfadh mórchuid cineálacha tionscadail oideachais a bheith i gceist, cuir i gcás cosc a chur ar luathfhágáil na scoile, feabhas a chur ar bhun-inniúlachtaí ar nós inniúlachtaí matamaitice agus ríomhaireachta, agus teangacha iasachta a mhúineadh.
Fostaíocht agus fiontraíocht
Tionscadail atá ceaptha dul i ngleic le gnéithe den dífhostaíocht, agus cúnamh a thabhairt do dhaoine meon na fiontraíochta a chothú.
Cruthaitheacht agus cultúr
Tionscadail ina n-úsáidtear na healaíona cruthaitheacha agus an cultúr chun cuidiú le pobail deacrachtaí de shaghsanna éagsúla a shárú.
Spórt
Tionscadail atá ceaptha an cuimsiú sóisialta, comhdheiseanna agus cleachtadh spórt a mhéadú, cleachtadh spórt i measc ghnáthphobail na sochaí san áireamh.