Esprimi l-opinjonijiet tiegħek fil-Parlament Ewropew taż-Żgħażagħ

L-aħħar aġġornament sar fi Il-Ħadd, 05/09/2021

Il-Parlament Ewropew taż-Żgħażagħ hu network ta’ żgħażagħ mill-Ewropa kollha li huma interessati li jesprimu l-opinjonijiet tagħhom dwar kwistjonijiet politiċi u soċjali, li jibnu esperjenzi bejn il-fruntieri u jiksbu ħiliet siewja.

Inti kurjuż li tiskopri opinjonijiet alternattivi, kulturi oħrajn, nies ġodda u tiddiverti? Kull min għandu bejn il-15 u l-24 sena u bbażat fl-Ewropa, mhux biss fl-UE, hu mistieden jieħu sehem.

Dwar xiex inhu?

Il-Parlament Ewropew taż-Żgħażagħ (EYP) hu waħda mill-aqwa pjattaformi għaż-żgħażagħ Ewropej interessati li jimpenjaw ruħhom f’dibattitu politiku, jiltaqgħu ma’ kulturi ġodda, u jiskambjaw ideat ma’ żgħażagħ oħrajn mill-Ewropa kollha. 

L-EYP hu network ta’ organizzazzjonijiet taż-żgħażagħ attivi f’40 pajjiż fl-Ewropa kollha taħt il-kappa tal-Fondazzjoni Schwarzkopf Young Europe li tospita l-Uffiċċju Internazzjonali tal-EYP. 

Kif taħdem?

L-EYP torganizza sessjonijiet internazzjonali, reġjonali u nazzjonali li jistgħu jdumu minn sagħtejn sa 10 ijiem. Dawn l-attivitajiet jinvolvu aktar minn 30,000 żagħżugħ u żagħżugħa kull sena.

Id-dibattiti jkopru firxa wiesgħa ta’ suġġetti, ħafna drabi b’rabta mal-politika internazzjonali jew id-drittijiet tal-bniedem, iżda wkoll oqsma bħat-tibdil fil-klima, is-saħħa u l-enerġija. Immexxija minn moderaturi pari, iż-żgħażagħ jieħdu sehem f’sensiela ta’ attivitajiet.

“Ikun xi jkun l-isfond tiegħek, kulħadd jingħata merħba u kulħadd jingħata opportunità biex jipparteċipa fil-Parlament Ewropew taż-Żgħażagħ!” Carlota (20), voluntiera attiva fil-Portugall

Tixtieq tingħaqad?

Bħala bidu, nirrakkomandaw li tagħti ħarsa lejn is-sit web tal-Parlament Ewropew taż-Żgħażagħ biex tifhem il-filosofija wara din l-inizjattiva. Lest li tissieħeb? 

Dawn huma l-passi:

• Ikkuntattja lill-EYP f’pajjiżek u skopri fejn se tibda. Jekk pajjiżek mhux elenkat tista' tikkuntattja l-uffiċċju internazzjonali tal-EYP.
• Attendi avveniment tal-EYP: tista’ tirreġistra għal avveniment f’pajjiżek bl-EYP nazzjonali tiegħek u tesperjenzah direttament.
• Sir membru tal-EYP.