Il-belt Ġermaniża ta’ Hamburg toffrilek ħafna x’tagħmel u x’tesplora, u għalhekk hija waqfa perfetta fil-vjaġġ tiegħek tad-DiscoverEU. Kont taf li għandha aktar pontijiet minn kwalunkwe belt Ewropea oħra? Sfida lil sħabek biex isibu kemm jista’ jkun minn dawn il-pontijiet u agħti punti extra lil min jirnexxilu jsib l-eqdem pont fil-belt, li nbena fl-1633! Hamburg, metropoli tat-Tramuntana, kienet Belt Kapitali Ekoloġika tal-Ewropa fl-2011 u ħadet miżuri bħall-introduzzjoni ta’ sorsi ta’ enerġija rinnovabbli u l-projbizzjoni tal-fliexken tal-plastik u tat-tazzi tal-kafè li jintużaw u jintremew fl-uffiċċji pubbliċi. Saħansitra hemm pjanijiet biex sal-2034 ikunu tneħħew il-karozzi miċ-ċentru tal-belt sabiex jintuża esklużivament minn dawk li jkunu għaddejjin bir-roti jew bil-mixi.

Waħda mill-missjonijiet tal-ħajja ekoloġika u tal-ekonomija ċirkolari hija li jinstab skop ġdid għal affarijiet qodma. F’Poznań, waħda mill-eqdem bliet tal-Polonja, dan huwa eżattament dak li seħħ b’sensiela ta’ fortizzi u fortifikazzjonijiet storiċi. Il-Fortyfikacje w Poznaniu huma binjiet tas-seklu dsatax li jinsabu fiċ-ċentru tal-belt u f’ċirku madwar il-periferija. Dawn ġew ippreservati bis-saħħa tal-programm Natura 2000 tal-UE minħabba li huma postijiet ta’ kenn siewja għal ħafna speċijiet protetti ta’ friefet il-lejl.

Olsztyn, li hija ddefinita mill-brikks ħomor u l-arkitettura gotika tagħha, hija waħda mit-teżori moħbijin tal-Polonja. Il-belt, li kien joqgħod fiha Nicolaus Copernicus, tinsab fit-Tramuntana tal-foresta Napiwodzko-Ramucka – żona protetta mill-UE fl-ambitu tal-programm Natura 2000. Il-foresta fiha ħafna speċijiet protetti ta’ għasafar, inklużi l-għasfur ta’ San Martin, l-ajkla tat-tikki, u l-kokka imperjali – kemm-il speċi tista’ tilmaħ?

Fil-Lvant tal-belt storika Litwana ta’ Kaunas hemm il-Kauno Marios (jew il-“Kaunus Lagoon”), ġibjun artifiċjali protett mill-UE bħala sit tan-Natura 2000. Il-ġibjun mhux biss jospita ħafna speċijiet ta’ insetti, ħut, lontri, u friefet il-lejl, iżda d-diga hija wkoll is-sit tal-impjant tal-enerġija idroelettrika ta’ Kaunas, li jipprovdi lill-belt b’enerġija ekoloġika u rinnovabbli. Ix-xatt madwar il-peniżola ta’ Pažaislis huwa adattat għall-għawm u hemm postijiet tajbin ħafna għall-kampeġġ aktar lejn in-Nofsinhar tul il-ġibjun, f’Duobakalnis u Samylai. Għaldaqstant, ippakkja l-malja tal-għawm, tella’ tinda, u gawdi l-ħajja fuq barra Litwana.

B’attrazzjonijiet li jvarjaw mill-knejjes neoklassiċi sal-passat affaxxinanti tagħha, Vilnius għandha tkun fuq il-lista tal-bliet li se żżur. Vilnius hija waħda mill-15-il belt li taw bidu għall-Premju tal-Belt Kapitali Ekoloġika tal-Ewropa, u 46% tagħha huma okkupati minn parks, ġonna, imsaġar, u foresti. Forsi l-aktar eżempju ikoniku huwa l-Park Kalnai, li fih hemm l-Għolja tat-Tlett Islaleb. Is-slaleb huma simbolu nazzjonali, u għalhekk imxi sal-quċċata tal-għolja biex mhux biss tgawdi veduta liema bħalha tal-belt iżda tesperjenza wkoll aspett tal-wirt kulturali Litwan. Il-belt bniet ukoll impjanti tal-enerġija biex tirkupra l-enerġija mill-iskart muniċipali, u b’hekk Vilnius qorbot lejn ir-realizzazzjoni tal-ekonomija ċirkolari.

Il-belt turistika Latvjana ta’ Jūrmala tinsab qrib il-bajjiet tal-Golf ta’ Riga, qrib il-Baħar Baltiku. Fiha hemm il-Park Nazzjonali Kemeri, żona ta’ art mistagħdra u ta’ torbiera mistagħdra li fiha firxa unika ta’ ħajja selvaġġa li tinkludi wiżż, kokok, u gremxul tal-ilma. Bħala żona importanti għall-bijodiversità, il-park nazzjonali huwa protett mill-UE bħala sit tan-Natura 2000 u jimmerita żjara minn kwalunkwe vjaġġatur ħerqan li jara l-annimali fil-ħabitat naturali Latvjan tagħhom.

Il-belt kapitali Estonjana ta’ Tallinn, li tinsab fuq ix-xtut tal-Golf Baltiku tal-Finlandja, hija famuża għall-fortizza medjevali u għall-belt antika sabiħa tagħha. Il-belt kienet finalista tal-Premjijiet tal-Belt Kapitali Ekoloġika tal-Ewropa fl-2019 u fl-2022, u f’dawn l-aħħar snin eliminat id-dipendenza tagħha fuq l-industrija peżanti. Titjib reċenti fil-lagi u x-xtut tal-belt wassal biex dawn jiksbu l-istatus tal-Bandiera Blu għall-kwalità tal-ilma għall-għawm, u l-belt neħħiet il-ħlas għat-trasport pubbliku għar-residenti tagħha. Il-karozza tal-linja numru 1A tieħdok mal-kosta lejn il-Grigal tal-belt. Għalhekk, irkibha u mur ittestja l-kwalità tal-ilma inti stess!

Bejn is-sawni, il-ħut frisk, u l-kċina Nordika tagħha, kif ukoll it-taħlita unika ta’ stili arkitettoniċi li għandha, f’Ħelsinki se ssib ħafna x’tagħmel. Barra minn hekk, il-belt tat il-kelma tagħha li sal-2035 tkun saret newtrali f’termini ta’ emissjonijiet tal-karbonju – impenn li diġà bdew jidhru r-riżultati tiegħu minħabba li stħarriġ tal-2014 sab li tliet kwarti tal-vjaġġi li jsiru fil-kapitali Finlandiża huma sostenibbli. Biex nibqgħu fuq l-istess tema, għaliex ma tikrix rota u taqsam sal-gżira ta’ Seurasaari, li hija aċċessibbli mill-kontinent permezz ta’ pont? Fuq din il-gżira msaġġra u serena hemm il-mużew fil-beraħ ta’ Seurasaari, li ppreserva u rriloka bini storiku minn madwar il-pajjiż biex jipprovdi stampa kulturali tal-ħajja tradizzjonali Finlandiża.

Dik li bdiet bħala missjoni biex jitnaddaf il-Lag Vesijärvi wasslet biex il-belt ta’ Lahti tingħata t-titlu ta’ Belt Kapitali Ekoloġika tal-Ewropa għall-2021. Lahti, li hija mdawra b’foresti densi fin-Nofsinhar tal-Finlandja, mhux biss qed timmira li sal-2025 tkun saret belt newtrali f’termini ta’ emissjonijiet tal-karbonju, iżda għandha wkoll it-tir li sal-2050 tkun saret ekonomija ċirkolari – kompletament mingħajr skart. Il-vjaġġaturi tad-DiscoverEU jistgħu jsibu ħafna x’jaraw u x’jagħmlu fil-Lag Vesijärvi – fosthom li jaqsmu l-lag bil-kenura u li jesperjenzaw il-funtana mużikali mhux tas-soltu max-xtut tan-Nofsinhar tal-lag.