Tá tionchair chultúrtha éagsúla ag gastranamaíocht na Rómáine - tá oidis agus stíleanna ó na Rómhánaigh, ón Tuirc, ón nGréig, ón Ostair agus ón mBulgáir curtha in oiriúint acu, rud a fhágann gur áit iontach í chun miasa nua a thriail. Agus tú in Timișoara, déan cinnte cuairt a thabhairt ar mhargadh, áit ar féidir leat triail a bhaint as táirgí úra ó cheantair thuaithe na Rómáine. Tá neart miasa blasta agus speisialtachtaí áitiúla le fáil sa chathair, cuir i gcás salată de vinete, sailéad ubhthorthaí rósta, nó zacuscă, dipín déanta d’ubhthorthaí agus piobar dearg. A bhuí le stair fhada nuálaíochta na háite (tugtar ‘cathair na gceannródaithe’ ar Timișoara) agus a cultúr, ainmníodh Timisoara mar Phríomhchathair Chultúir na hEorpa 2023, rud a spreag oidhreacht chultúrtha nua. 

Nuair a bronnadh Príomhchathair Chultúir na hEorpa uirthi in 2010, ba spreagadh é chun Ceathrú Chultúrtha Zsolnay a athchóiriú, agus mol cultúrtha nua a dhéanamh d’fhoirgnimh mhonarchan a bhí as úsáid roimhe sin. Agus tú in Pécs, tapaigh an deis chun triail a bhaint as miasa traidisiúnta na hUngáire, cuir i gcás halászlé (anraith éisc te agus spíosrach le paiprice te a bhfuil an-cháil air) nó anraith samhraidh cosúil le spenótfozelék (anraith spionáiste) nó b’fhéidir tökfozelék (anraith puimcín). Is féidir leat cuairt a thabhairt freisin ar an margadh agus taitneamh a bhaint as torthaí agus glasraí úra. Tar éis duit lón blasta a ithe, téigh ag spaisteoireacht síos Sráid Király atá do choisithe amháin, agus buail isteach chuig ceann de na caiféanna iomadúla atá ar an dá thaobh den tsráid, nó bain lán na súl as na haghaidheanna Nuachlasaiceacha agus tithe stairiúla.

A bhuí le tionchair na Gréige, na Bulgáire, na Tuirce agus na hUngáire, tá bia na Seirbia an-éagsúil ar fad, rud a fhágann gur áit iontach í an tSeirbia le cur le do thaithí cócaireachta. Tabhair cuairt ar mhargaí glasa chun torthaí agus glasraí úra agus táirgí baile a cheannach. Is margaí iontacha le nochtadh iad Riblja Pijaca (margadh éisc) agus Margadh Futoška. Is áit iontach í Novi Sad le do bhealach a dhéanamh timpeall ar shiúl na gcos agus goile a thabhairt duit féin. Féadfaidh tú siúl síos Sráid Dunavska (an Danóib) atá coisithe go páirteach agus lán na súl a bhaint as mórthithe an bhaile a tógadh i lár an 19ú haois tar éis an damáiste go léir a rinneadh do Novi Sad le linn réabhlóid 1848. Le déanaí, ba í Novi Sad Príomhchathair Chultúir na hEorpa 2022, rud a d’fhág oidhreacht áiteanna suimiúla le nochtadh.

Tá mealltacht uathúil agus stair shaibhir ag Scóipé. Is áit iontach í freisin chun triail a bhaint as mias náisiúnta na Macadóine Thuaidh, tavče gravče - pónairí stofa le hoinniúin agus blastanais. Tá saol bríomhar itheacháin agus ólacháin ag Debar Maalo, ceantar álainn le crainn mórthimpeall, agus is áit iontach í chun speisialtachtaí áitiúla a thriail. Nó féadfaidh tú taitneamh a bhaint as blas na staire sa Seanbhasár ón 12ú haois in Scóipé nó trí chuairt a thabhairt ar Dhaingean Tvrdina Kale de chuid na Biosáinte (agus Otamán ina dhiaidh sin) ón 6ú haois AD. Is fiú go mór freisin cuairt a thabhairt ar Čaršija, baile ársa Otamáin ar thaobh cnoic in Scóipé lena lánaí lúbacha agus a struchtúir stairiúla.

Tá Plovdiv suite idir Sléibhte na mBalcán, Sredna Gora agus Rhodope i lár Ghleann na Tracians. Tá áilleacht nádúrtha timpeall uirthi – scornaí, cnoic, foraoisí, easanna – agus moltar go mór turas lae a dhéanamh ann chun ceangal leis an nádúr. Laistigh den chathair, tá go leor láithreacha suimiúla le cuairt a thabhairt orthu, cuir i gcás an Amharclann Rómhánach ársa (a úsáidtear fós sa lá atá inniu ann) agus séipéal Sveta Bogoroditsa a tógadh in 1884 ar shuíomh scrín ón 9ú haois. Ba í Plovdiv Príomhchathair Chultúir na hEorpa 2019 freisin. Nó is féidir leat cuairt a thabhairt ar cheann de mhargaí Plovdiv chun glasraí áitiúla a cheannach. Is minic a dhíolann na daoine a fhásann na glasraí iad féin iad agus bain triail as boza (tugtar bosa air freisin), deoch atá beagán coipthe a dhéantar ó ghrán buí, ó chruithneacht nó ó phlúr ríse. Deirtear gur deoch í a dhéanann maitheas don tsláinte. Is cuid thábhachtach de bhia na Bulgáire iad glasraí coipthe, agus léirigh staidéir a rinneadh le déanaí go dtéann siad chun tairbhe do bhaictéir goile maith.

An áit a thagann an Eoraip agus an Áise le chéile... cathair shuimiúil spreagúil dhosháraithe – fáilte go hIostanbúl. Is áit iontach í an chathair bhríomhar seo chun meascán de chultúir bia a nochtadh duit féin. A bhuí le héagsúlacht aeráidí na Tuirce, chomh le rochtain ar an bhfarraige agus stair Iostanbúl mar bhealach trádála tábhachtach, tá éagsúlacht iontach de chomhábhair, spíosraí agus luibheanna úra le fáil ann. Is rudaí ar leith iad na margaí bia iontacha atá le fáil in Iostanbúl, ó mhargaí seachtainiúla faoin aer a dhíolann táirgí úra ón tuath in aice láimhe go margaí buana a dhíolann iasc úr, spíosraí agus táirgí orgánacha. Tá an Basár Éigipteach ann ó 1660 agus mar sin is eispéireas cócaireachta agus stairiúil é cuairt a thabhairt air. Ná caill triail a bhaint as sú pomagránaití úrbhrúite, a dhíoltar go séasúrach ar chairteacha ar fud na cathrach i mí Mheán Fómhair agus i mí Dheireadh Fómhair.

Is cathair bhríomhar í Sóifia le saol beoga óige agus cultúr bia. Agus tú ar cuairt, bain triail as shopska salata, sailéad simplí le cúcamair, trátaí, oinniúin earraigh, piobair agus cáis saillte nó tarator, anraith cúcamair agus iógairt, a itear fuar, nó kiselo mlyako, cineál iógairt de chuid na Bulgáire a bhfuil cáil air mar gheall ar a bhlas géar agus a thiubh atá sé. Meastar go mbaineann go leor tairbhí sláinte leis. Tabhair cuairt ar Halla Margaidh Lárnach Shóifia atá ar cheann de na foirgnimh mhargaidh is sine atá fós in úsáid, nó Margadh na mBan a ndearnadh athchóiriú air le déanaí chun roinnt glasraí úra a cheannach agus na miasa a ullmhú tú féin. Tá athbheochan ghlas ar siúl i Sóifia faoi láthair; sháraigh sí a stair thionsclaithe agus in 2022, bhí sé sa bhabhta ceannais do Ghradaim Phríomhchathair Ghlas na hEorpa.