Правила на DiscoverEU конкурсот¹

1. Опис

DiscoverEU е иницијатива во рамки на програмата Еразмус+ (2021-2027) Таа има за цел да им понуди на младите луѓе на 18 годишна возраст, искуство преку патување кое што ќе го зајакне нивното чувство за припадност на Европската унија, ќе им овозможи да ја истражат разноликоста на Европа, нејзиното културно наследство и историја, како и да ги поврзе луѓето од целиот континент и на крајот да се спознаат самите себе.

На пролет 2024 година, Европската комисија и Европската извршна агенција за образование и култура (ЕИАОК, анг: EACEA) ќе изберат најмалку 35.000 млади луѓе кои што ги исполнуваат критериумите за учество опишани во продолжение на текстот. Младите луѓе може да се пријават на Европскиот младински портал. Периодот за пријавување ќе биде отворен од 16 април 2024 (12:00:00 на пладне временска зона Брисел) до 30 април 2024 (12:00:00 на пладне временска зона Брисел)

Европската комисија и ЕИАОК ќе им доделат на младите луѓе патување за да ја истражуваат Европа помеѓу 1 јули 2024 година и 30 септември 2025 година за период од максимум еден месец.

Основно правило е учесниците да патуваат со железница. Меѓутоа, со цел да се обезбеди пристап за што поширок круг на учесници, иницијативата ќе понуди и алтернативни начини на превоз, како например траекти или автобуси кога тоа е неопходно, а притоа земајќи ја во предвид грижата за околината, траење на патувањето и растојанието.

Во исклучителни ситуации, а кога не се достапни други транспортни средства, дозволено е патување со авион. Ова ќе им овозможи на младите луѓе кои што живеат во далечни региони или на острови да имаат шанса да учествуваат во DiscoverEU.

Наградените учесници ќе добијат, исто така, и Европска младинска картичка (ЕМК – EYCA). Оваа картичка ќе биде достапна за активирање во специјалната апликација DiscoverEU Travel, која ќе биде достапна за учесниците по завршувањето на процесот на резервација. Картичката е валидна 1 година по нејзиното активирање и ќе им овозможи на младите попусти за посети и активности од областа на културата, учење, природа, спорт, локален транспорт, сместување, храна итн.

2. Кандидати кои ги исполнуваат условите

За да може да се пријават, кандидатите мора да:

имаат 18 години на 1 јули 2024 година, т.е., млади луѓе родени помеѓу 1 јули 2005 година и 30 јуни 2006 година (вклучувајќи ги и тие датуми);
да бидат државјани или легални резиденти на една од следните земји:
- 27-те земји членки на Европската унија вклучувајќи ги и нејзините надворешни региони (Француска Гвајана (ФР), Гвадалупе (ФР), Мартиник (ФР), ла Реунион (ФР), Мајот (ФР), Свети Мартин (ФР), Азурите (ПТ), Мадеира (ПТ) и Канарските острови (ЕС)), или
- државјани на една од 27-те земји членки на Европската унија, како и легални резиденти на една од прекуморските земји и територии поврзани со Европската унија: Аруба (НЛ), Бонаир (НЛ), Курacао (НЛ), Француска Полинезија (ФР), Француски јужни и антарктички територии (ФР), Гренланд (ДК), Нова Каледонија (ФР), Саба (НЛ), Свети Бартоломеј (ФР), Свети Еустатиус (НЛ), Свети Мартен (НЛ), Свети Пјер и Микелон (ФР), Валис и Фортуна острови (ФР), или
- трети земји кои се поврзани со програмата Еразмус+: Исланд, Лихтенштајн, Северна Македонија, Норвешка, Србија и Турција;
да се внесе правилниот бројот на лична карта или број на пасош или број на дозвола на легален резидент во онлајн формуларот за пријавување.

Ако се наградени, избраните кандидати може да патуваат само ако:

го започнат нивното патување во некоја од земјите кои ги исполнуваат условите за DiscoverEU (види погоре) во моментот на доделувањето на наградата;
планираат патувањето да им трае од 1 ден до највеќе еден месец вклучително;
планираат да отпатуваат во најмалку една странска земја која ги исполнуваа условите за DiscoverEU (види погоре) во моментот на доделувањето на наградата;
имаат волја да станат DiscoverEU амбасадори.

Ниеден кандидат кој што не ги исполнува критериумите за учество, нема да биде земен во предвид во процесот на избор.

3. Постапка на пријавување

Циклусот на пријавување за DiscoverEU е отворен преку специјален онлајн образец за пријавување на Европскиот младински портал. Нема да биде можно да се поднесе пријава пред или по периодот за пријавување наведен во точка 1.

Постапката за пријавување се состои од 7 чекори:

Кандидатите ќе мора прво да го поминат тестот за проверка на исполнувањето на критериумите, што значи дека ќе мора да внесат својот датум на раѓање, националност и место на живеење. Ако тие податоци не се во согласност со условите за учество наведени под точка 2 „Кандидати кои ги исполнуваат условите за учество“, тие нема да можат да продолжат на следниот чекор. Покрај тоа, од нив ќе се побара да се согласат со правилата на DiscoverEU конкурсот, на тоа да нивните лични податоци да бидат чувани и обработувани за целите на конкурсот DiscoverEU, како и да се согласат да бидат контактирани во врска со DiscoverEU од страна на Европската комисија и организациите овластени од неа за тие цели, како и од ЕИАОК и националните агенции на Еразмус+ и Еуродеск.
Кандидатите ќе мора да наведат дали тие сакаат да патуваат сами или во група од максимум 5 луѓе.
Кандидатите ќе треба да наведат важечка адреса на е-пошта. Откако ќе го направат тоа, ќе добијат автоматска порака од Европскиот младински портал со цел да потврдат дали е-поштата е важечка. Оваа верификација е потребна заради комуникацијата со кандидатите по изборот која што ќе се одвива преку е-пошта. Со барањето од апликантите да ја потврдат нивната е-меил адреса, Европската комисија и ЕИАОК спречуваат неовластено користење на е-пошта од други луѓе.
По потврдувањето на нивната е-пошта, младите луѓе ќе треба да пополнат образец за пријавување. Прво, тие ќе треба да ги дадат своите лични податоци: националност, дата на раѓање, име, презиме, пол, е-меил адреса, телефонски број, земја на правен резидент, регион, занимање и број на лична карта, пасош или број на дозвола за легален резидент. Младите луѓе со намалена подвижност и/или инвалидитет ќе имаат можност да ги назначат нивните посебни потреби.
Откако ќе ги пополнат нивните лични податоци, сите апликанти треба да одговорат на 5 квиз прашања со повеќе понудени одговори во врска со општото познавање за Европската унија и другите ЕУ иницијативи кои се однесуваат на младите луѓе. На крајот, ќе треба да одговорат и на додатно прашање. Кандидатите ќе бидат избрани сè додека има расположлив буџет и ќе бидат рангирани согласно точноста и времето на нивните одговори.
Кандидатите ќе треба да дадат дополнителни информации за нивните планови за патување (т.е. кога планираат да го започнат патувањето, дали им е прв пат да патуваат сами без родителите, што сакаат да научат од тоа искуство, како ќе го финансираат патувањето и како дознале за DiscoverEU). Информациите внесени во овој дел не се обврзувачки и нема да имаат влијание врз процесот на избор. Собраните податоци ќе се користат за статистички цели и како информација за Европската комисија и ЕИАОК со цел подобрување на DiscoverEU.
Сите апликанти ќе добијат потврда по е-пошта преку Европскиот младински портал, откако ќе ја поднесат нивната пријава. Оваа е-пошта ќе ги извести дека нивната пријава е регистрирана и ќе го добијат кодот на пријавата и временски распоред на комуникацијата на постапката за избор.

Секој ќе добие код по поднесување на образецот за пријавување. Кандидатите треба да го чуваат овој код на пријава за секоја понатамошна комуникација. Ако апликантот сака да покани луѓе да се придружат на неговата/нејзината група, тогаш тој/таа станува носител или претставник на таа група и ќе треба да им го даде кодот на другите членови на групата за да можат тие да се регистрираат. Врз основа на кодот даден на носителот на групата, другите членови на групата ќе треба да се регистрираат онлајн и да ги пополнат нивните лични податоци.

Имајте во предвид дека членовите на групата не треба да учествуваат во квизот и одговараат на додатното прашање бидејќи само носителот на групата треба да одговата на квизот и додатното прашање. Сепак, тие треба да ги пополнат нивните лични податоци со цел да се потврди нивната пријава. Членовите на групата треба да ги исполнуваат истите критериуми за учество: Да имаат 18 години и легален престој во некоја од земјите членки на Европската унија или една од третите земји поврзани со програмата Еразмус+: Исланд, Лихтенштајн, Северна Македонија, Норвешка, Србија и Турција; Ако кандидатите назначиле дека сакаат да патуваат сами, тие сепак може да додадат пријатели по поднесувањето на пријавата и пред крајниот рок, ако ја следат истата процедура наведена погоре.

Групата пријава ќе се разгледува како единствена пријава. При изборот ќе бидат разгледувани само оние членови на групата кои ја пополниле пријавата и го навеле кодот обезбеден од носителот на групата. Членовите на групата не треба да се регистрираат поединечно.

Групите може да бидат составени од лица од различни националности кои живеат на различни места.

Едно лице моѓе да поднесе само една пријава. Првата регистрирана пријава на Европскиот младински портал ќе се смета за единствена при постапката на избор. Поединци не може да се пријавуваат во различни групи. Ако во теот на било која фаза на постапката се откријат повеќе пријави, само првата пријава регистрирана на Европскиот младински портал ќе биде земена предвид за селекција.

Младите кои што веќе добиле патна пропусница за DiscoverEU во некој од претходните кругови на пријавување, не ги исполнуваат условите за да поднесат нова пријава. Ова ќе биде откриено во фаза на поднесувањена пријавата. Ако во било која фаза од спроведување на акцијата, Европската комисија, ЕИАОК или изведувачот кој што е назначен од нив да ги спроведува резервациите за патување, се откријат пријави на млади кои добиле пропусница за патување од DiscoverEU во рамките на некој од претходните циклуси на пријавување, тој кандидат ќе биде дисквалификуван.

4. Постапка и критериуми за избор

За секоја земја е утврдена квота на патни пропусници. Распределбата е врз основа на клучната акција 1(мобилност за поединци-млади), на програмата Еразмус+.

Процесот на избор ќе се врши согласно местото на живеење наведено од кандидатот во формуларот за пријавување. Во случај да има помалку пријави од фиксната квота за земјата, останатите патни пропусници ќе бидат прераспределени на апликантите кои што живеат во земји со повеќе пријави од фиксните квоти.

Местото на живеење на носителот на групата ја определува резидентноста која што ќе биде земена предвид за пресметување на квотите. Ако некоја група е последна во листата на избрани кандидати за некоја држава, а квотата за истата е пополнета, тогаш ќе биде избрана целата група.

Кандидатите прво ќе треба да ја поминат проверката за исполнување на критериумите, т.е. соодветни датуми на раѓање и место на живеење наведени под точките 2 и 3. Имајте во предвид дека ова ќе биде автоматски проценето во текот на пријавувањето, а доставените податоци ќе бидат двојно проверени од договарачот од Европската комисија и ЕИАОК задолжен за резервации за патување. Ако при проверка на личната карта, пасошот и/или дозволата за легален престој, договарачот открие дека кандидатот дал лажна изјава, тој/таа ќе бидат исклучени од конкурсот.

Ако сите критериумите за учество се исполнети, кандидатите потоа ќе треба да ги исполнат критериумите за избор, т.е., да дадат точни одговори на 5-те прашања со повеќе понудени одговори и да одговорат на додатното прашање. Доколку се работи за групи, само носителот на групата ќе треба да ги одговори 5-те квиз прашања и на додатното прашање.

Кандидатите ќе бидат групирани спрема местото на живеење и ќе бидат рангирани според точните одговори на 5-те квиз прашања, а потоа и според одговорот на додатното прашање.

По завршувањето на периодот за пријавување, резултатите ќе бидат извадени од Европскиот младински портал и ќе бидат испратени до членовите на комисија за избор кој ќе даде крајна оценка.

Ако има преголем број на пријави (поединечни или групни) кои што на крајот се исто рангирани на граница на фиксната квота, Европската комисија и ЕИАОК ќе го применат принципот на „прв дојден прв услужен” за да ги утврдат добитниците на последните места.

5. Комисија за избор

Комисијата за избор составена од персонал од Европската комисија и ЕИАОК, ќе се состане кога ќе заврши кругот за пријавување. Таа ќе ги разгледа резултатите од изборот врз основа на горенаведените критериуми. Комисијата ќе направи процена и конечно рангирање на избраните кандидати на кои ќе им се доделат патните пропусници врз основа на нивните одговори на прашањата од квизот и додатното прашање, земајќи ја притоа во предвид квотата по земја, а ако е применливо, и времето на поднесување на пријавата. Откако ќе биде направен изборот, ќе се направи резервна листа на кандидати. Кандидатите на оваа резервна листа може да бидат избрани за патни пропусници во случај кога има нераспределен преостанат буџет или кога избраните кандидати ќе се откажат од своите патни пропусници или нема да ги активираат истите (видете точка 7).

Врз основа на проценката на комисијата за избор, ЕИАОК ќе донесе одлука за изборот со информации за вкупниот број на доделени патни пропусници, вкупниот буџет кој што е распределен за патни пропусници, листа на избраните кандидати и резервната листа како и листа на одбиени кандидати.

6. Известување за резултатите

Кога постапката за избор ќе заврши, ќе можеш да провериш на Европскиот младински портал дали си избран/а или не, користејќи го твојот код на пријава.

Исто така, ќе добиеш известување преку е-пошта во кое ќе стои дека:

си избран/а за добитник на главната листа („избран кандидат") или
си предложен/а за резервната листа или
не си избран/а.

Откако избраните кандидати од главната листа ќе бидат известени, листата на избраните ќе биде доставена до договарачот назначен од Европската комисија и ЕИАОК, кој што ќе се погрижи за резервациите на патувањата. Потоа ќе биде воспоставена понатамошна комуникација помеѓу овој договарач и избраните кандидати. Повеќе информации може да најдете во точка 8.

7. Резервна листа

Откако ќе се достигне прагот на расположливите патни пропусници, се составува резервна листа. Резервната листа ги рангира кандидатите/ките според нивните одговори на прашањата од квизот и дополнителните прашања, како и времето на поднесување на апликацијата. Европската комисија и ЕИАОК може да доделат патни пропусници на кандидатите кои што се ставени на резервната листа во следните случаи: кога избраните кандидати ја повлечат својата пријава или избраните кандидати не ги активираат своите патни пропусници до крајниот рок наведен во точката 8, или ако вредноста на одбраните патни пропусници е помала од расположливиот буџет. Овој механизам може да се применува до целосно користење на расположливиот буџет. Потрошувачката на буџетот ќе се ревидира секој месец.

Со вклучувањето на резервната листа, Европската комисија и ЕИАОК не се обврзуваат и не гарантираат дека ќе бидете избрани во подоцнежната фаза.

Кандидатите вклучени во резервната листа може да бидат контактирани од договарачот назначен од Европската комисија и ЕИАОК за да ги организира резервациите за патување, со покана да се регистрираат на платформата за резервирање. Оние кои што ќе бидат контактирани затоа што се ставени на резервната листа, не може да бараат надоместување за патувањата направени пред поканата, ниту пак да бараат продолжување на периодот за патување.

8. Резервирање на билетите за патување и правила на патувањето

Избраните кандидати мора да го започнат своето патување од земјата која што е дел од DiscoverEU (види точка 2 – кандидати кои ги исполнуваат условите) и ќе патуваат во најмалку една земја, која што исто така е дел од DiscoverEU а која не е земјата на тргнување. Целото патување може да трае од минимум 1 ден до максимум 1 месец, вклучително. Патувањето треба биде во периодот од 1 јули 2024 до 30 септември 2025 година. Патната пропусница може да се користи во земјата на живеење само за едно излезно и едно влезно патување.

Патните пропусници за избраните кандидати ќе бидат резервирани, купени и доставени од страна на договарачот назначен од Европската комисија и ЕИАОК. Избраните кандидати во никој случај не смеат да резервираат патни пропусници сами или преку туристичка агенција. Патните пропусници купени директно од избраните кандидати нема да бидат надоместени.

Изведувачот назначен од Европската комисија и ЕИАОК ќе ги контактира избраните кандидати/ки и ќе им овозможи пристап до мобилна апликација DiscoverEU Travel App. Апликацијата ќе им овозможи пристап до поддршка и ќе даде предлози за учесниците да ги осмислат своите маршрути и да го подготват своето патување. Во мобилната апликација, ќе биде достапна и дигитална картичка за попуст (Европска младинска картичка) за сите учесници.

Оваа картичка ќе им овозможи пристап до разни попусти и погодности во сите земји учеснички во програмата Еразмус+. Картичките за попуст купени директно од страна на избраните учесници нема да бидат надоместени.

Договарачот ќе го избере најконкурентните и најсоодветните транспортни оператори.

По правило, избраните кандидати ќе имаат избор помеѓу следните 2 можности за патување:

Флексибилна можност за патување	Фиксна можност за патување
датумите на кои патуваат избраните кандидати се флексибилни се додека не се активира пропусницата за патување.	Избраните кандидати/ки ќе му ја кажат на изведувачот нивната посакувана маршрута на патување со фиксни денови и времиња на патување и претходно одредени дестинации.. Датумите и дестинациите на патувањето не можат да се менуваат откако ќе биде резервиран фиксниот билет. Патувањето треба да се одржи во период од највеќе еден месец.
Избраните кандидати ќе може да патуваат во период од максимум еден месец, со утврден број на денови за патување (7). Ова значи дека тие можат да патуваат со возови било кои 7 дена во период од максимум 1 месец. Флексибилната можност за патување им овозможува на избраните кандидати/ки да отпатуваат во колку сакаат земји кои се вклучени.	Избраните кандидати/ки ќе може да посетат највеќе до 2 земји кои што се дел од Европската унија или трети земји поврзани со програмата Еразмус+ (види точка 2) за време на донесување на одлуката за избор (ова не ја вклучува нивната земја на тргнување и земјите низ кои учесникот/та ќе помине) во период од максимум еден месец.
Откако ќе биде активирана пропусницата за патување, избраните кандидати може да патуваат во последователни денови или да ги распределат нивните 7 денови за патување во период од еден месец. Тие имаат дозвола да патуваат со возови управувани од Европските железнички компании, како и со некои траекти и други транспортни средства избрани од страна на изведувачот назначен од Европската комисија и ЕИАОК. За некои возови можеби ќе се бара дополнителна резервација на седиште. Учесниците кои ќе се одлучат за флексибилна патна пропусница, ќе имаат можност да резервираат до 4 места бесплатно преку онлајн системот во апликацијата Travel App* кој е овозможен од изведувачот. Европската комисија или ЕИАОК нема да ги надоместат трошоците за други резервации на седишта или пак други трошоци што ќе настанат во текот на патувањето.	Сите трошоци за резервации се вклучени во фиксната можност за патување, но вкупниот трошок не смее да надмине 283.26 евра и на тоа треба да се внимава. Избраните кандидати треба да се осигураат дека нивната маршрута е изводлива со воз.

*Учесниците/чките не можат бесплатно да резервираат седишта во прва класа, резервации за спиење во ноќните возови или резервации за возови кои железничките превозници не ги нудат преку интегрираниот систем за онлајн резервирање. Сите резервации резервирани бесплатно не се враќаат и не се разменуваат.

За флексибилната можност за патување:

Учесниците од избраната листа кои ќе ја изберат флексибилната опција за патување ќе имаат рок до 31 август 2024 година да ја активираат својата патна пропусница во апликацијата DiscoverEU Travel*. Тоа значи дека тие ќе треба да го наведат датумот на почеток на важноста на патната пропусница од 1 месец до пропишаниот рок. По активирањето на патната пропусница, датумот на почеток на патувањето може уште да се менува до крајот на периодот во кој може да се патува (т.е. од 01/07/2024 до 30/09/2025), под услов тоа да е направено пред да се избере датумот на тргнување. Ако датумот на тргнување е започнат, или ако е поминат, повеќе не може да се промени.

Ако учесниците не ја активираат патната пропусница до крајниот рок, договорачот може да ја откаже патната пропусница и да им ја понуди на кандидатите од резервната листа.

*Активирање на пропусницата за патување: Во апликацијата DiscoverEU Travel, ќе треба да го потврдиш својот пасош или лична карта и да го испланираш периодот од 1-месец на важност на пропусницата. Имај во предвид дека активирањето на EYCA картичката во апликацијата за патување не значи дека е активирана и самата патна пропусница.

За двете можности:

Откажувањата на плановите за патување не се поддржани. Ниту Европската комисија ни ЕИАОК не надоместуваат никакви додатоци или доплонителни трошоци настанати во текот на патувањето.

Избраните кандидати/ки кои што сакаат да патуваат во Кипар, Исланд, Ирска или Малта треба да го информираат договарачот преку контактната форма на центарот за помош, по објавата на специјалниот повик до сите избрани и учесници со резервации. Квотата која се наведува во одделот "Квота по земја" на Европскиот младински портал ќе се применува за тие кои што патуваат од Кипар, Исланд, Ирска и Малта. За избраните кандидати кои сакаат да патуваат во Кипар, Исланд, Ирска и Малта, оваа квота ќе се примени утростручена. Авионските билети за овие конкретни дестинации ќе бидат резервирани од страна на договарачот врз основа на принципот "прв дојден прв услужен". Избраните кандидати не треба сами да ги купуваат овие карти.

За млади луѓе кои живеат во земја која е дел од Европската унија или во трети земји поврзани со програмата Еразмус + (види точка 2), а кои имаат задолжително редовно или цивилно служење на воениот рок, може да се примени оттстапка на барањето за периодот на патување. Во тој случај, периодот на патување ќе биде продолжен на 6 месеци по завршувањето на нивните законски обврски.

9. Видови на транспортни средства

Избраните кандидати по правило патуваат со железница. Меѓутоа, со цел да се обезбеди пристап за што поширок круг на учесници, иницијативата ќе понуди и алтернативни начини на превоз, како например траекти или автобуси кога тоа е неопходно, а притоа земајќи ја во предвид грижата за околината, траење на патувањето и растојанието. Се патува во втора класа.
Само во посебни случаи, може да се дозволи и да се организира опција за патување со авион за избраните кандидати. Ова е во случај кога младите луѓе живеат:

Во деветте најоддалечени региони (Гвадалупе, Француска Гвајана, Мартиник, ла Реунион, Мајот, Свети Мартин, Мадеира, Азурите и Канарските острови);
Учесниците кои живеат во прекуморските земји и територии на ЕУ (Аруба, Бонаир, Куракао, Француска Полинезија јужни и антарктички територии, Гренланд, Нова Каледонија, Саба, Свети Бартоломеј, Свети Еустатиус, Свети Мартин, Свети Пјер и Микелон, Валис и Футуна)
Учесниците кои живеат во земјите/регионите кои што не се достапни за претходно наведените превозни средства (железница, траекти и автобуси);;
Кога младите луѓе треба да патуваат повеќе од 18 часа со земјен или поморски превоз пред да ја преминат најблиската граница на нивната земја на живеење.

Само нивното влезно и излезно патување може да биде со авион. За остатокот од патувањето, учесниците ќе треба да патуваат согласно основното правило (воз или други алтернативни превозни средства).

Младите луѓе од најоддалечените региони и прекуморски земји и територии може да изберат било која дестинација која што ги исполнува зададените барања. Избраните кандидати кои што сакаат да патуваат во најоддалечените региони и прекуморски земји и територии, можат да го направат тоа ако нивното патување се вклопува во ограничениот буџет од 283.26 евра.

Избраните кандидати кои што се жители на Кипар, Исланд, Ирска или Малта може да патуваат со авион до континентална Европа (за нив ќе се организира повратен билет).

10. Максимална вредност на билетите за патување

Избраните кандидати ќе ги добијат само патните пропусници и Европската младинска картичка. Трошоците за сместување, храна, осигурување, додатоците за патувањето или било кои други трошоци поврзани со патувањето се покриваат од самите кандидати.

Основното правило е дека секој избран учесник ќе има право на патна пропусница во вредност од 283,26 евра. Се патува во втора класа. Сепак, оваа сума може да биде повисока во исклучителни случаи наведени подолу:

За избраните апликанти кои што патуваат од најоддалечените региони на ЕУ и прекуморски земји и територии до континентална Европа. Откако ќе пристигнат во континентална Европа, се применува основното правило и за нив.
За изберени кандидати надвор од гореспоменатите географски зони кои мора да патуваат со авион до континентална Европа. Откако ќе пристигнат во континентална Европа, се применува основното правило и за нив.
Во некои конкретни ситуации кои што ќе се проценуваат секоја поединечно (на пример, за избрани кандидати кои живеат во други острови кои се дел од земјите на програмата Еразмус+) може да се покријат трошоците за дополнително патување со воз/траект/автобус.

За избрани кандидати со намалена подвижност и/или со посебни потреби: трошоците за посебна помош (придружно лице, куче за учесниците со оштетен вид итн.) може да бидат покриени врз основа на соодветните документи за оправдување на нивните посебни потреби, како што се бара според националното право на земјата на престој.

11. Индикативен временски распоред

Почетен датум за регистрација	16 април 2024 (12:00:00 пладне временска зона-Брисел)
Краен датум на регистрација	30 април 2024 (12:00:00 пладне временска зона Брисел)
Комисија за избор	Мај 2024
Известување за избор	Јуни 2024
Прв датум за тргнување	01 јули 2024
Последен датум за враќање	30 септември 2025

12. Повлекување или откажување на патувањето од страна на избраниот учесник/чка

Секоја патна пропусница ќе важи за точно одредено име и не може да се пренесува на друго лице. Името на патната пропусница не може да се менува.

Избраниот учесник/чка треба да ја активира својата патна пропусница пред крајниот рок од 31 август 2024 година. Ако патната пропусница не биде активирана до тој датум, договарачот, назначен од Европската комисија и ЕИАОК, може да ја откаже патната пропусница и да ја додели на друг учесник од резервната листа по опаѓачки редослед на рангирање.

Ако избраниот учесник се откаже од било кои причини, пред да договарачот, назначен од Европската комисија и ЕИАОК, ја резервира патната пропусница, неговото/нејзиното место ќе биде доделено на некој друг од резервната листа по опаѓачки редослед на избор. Избраните кандидати треба да го известат договарачот пред да направат било какви резервации.

Ако некој член на група (носител на група или член на група) го откаже патувањето пред договарачот на Европската комисија и ЕИАОК да го резервира патувањето, ова откажување нема да влијае на целата група. Останатите членови од групата и понатаму може да патуваат по планот. Сепак, лицето кое што се откажало не може да биде заменето. Дополнителното патување ќе биде доделено на лице од резервната листа по опаѓачки редослед на избор.

Прифатливо е доколку некои членови од групата на крајот решат да патуваат сами, при што истото нема да влијае на целата група.

Пропусницата за патување не може да се замени ниту да се добие повраток на пари. Флексибилната патна пропусница нуди отворен датум за започнување на патувањето, давајќи им на патниците можност да го сменат датумот во било кое време пред назначениот прв ден на патување.

Кај можностите за фиксни патувања, откажувањата и/или измените подлежат на правилата и условите на транспортерот; при што евентуалните дополнителни трошоци кандидатите треба сами да ги платат.

13. Виша сила

Во случај да патувањето е нарушено поради непредвидливи исклучителни ситуации или настани кои се надвор од контрола на учесникот, а не се резултат на негова/нејзина грешка или небрежност, можно е да се додели нова патна пропусница. Договарачот на Европската комисија и ЕИАОК ќе ги процени овие посебни ситуации за секој случај поединечно.

14. Известување за патувањето

Европската комисија сака да добие повратни информации од избраните кандидати кои патуваат и ги охрабрува младите DiscoverEU патници да ги споделат нивните искуства и авантури. По изборот, избраните кандидати ќе станат амбасадори на DiscoverEU иницијативата. Тие се повикуваат да известат за нивните искуства од патувањето, на пример преку социјалните медиуми или да одржат презентација во нивното училиште или во локалната заедница. Мобилната апликација DiscoverEU travel ќе им овозможи да креираат прилагодена мапа за планот за патување со статистика (како што е број на искористени возови, број на посетени земји и заштеда на емисии на јаглерод диоксид). Ова потоа може да се сподели и објави на социјалните медиуми на крајот од патувањето.

Кандидатите се добредојдени да се приклучат на официјалната Фејсбук група #DiscoverEU Official Facebook Group. Младите патници, исто така, ќе треба да дадат повратен одговор во онлајн анкетата испратена од договарачот на Европската комисија и ЕИАОК по нивниот период на патување. По нејзиното пополнување, патниците ќе добијат сертификат за учество кој што е автоматски генериран и во кој се нагласени способностите и вештините стекнати благодарение на нивното искуство со патувањето.

15. Виза

Во зависност од државјанството или предвиденото патување (во зона надвор од Шенген), на учесниците е можно да им е потребно една или повеќе визи. Издавањето на визи е во надлежност на државите. Ги советуваме учесниците да се информираат од официјални извори и да ги достават своите барања што порано до надлежните органи. Издавањето на виза може да потрае неколку недели. Поради тоа, барањата за виза треба да се поднесуваат повеќе од еден месец пред планираниот датум на тргнување. DiscoverEU патната пропусница нема да биде повторно резервирана поради одложено добивање на виза, во случај да барањето за виза е направено помалку од 4 недели пред датумот на заминување или помалку од 8 недели пред крајот на периодот на патување. Апликацијата за патување DiscoverEU travel и нејзиниот центар за техничка помош ќе пружи помош по ова прашање. Во секој случај, учесниците се одговорни да ги подготват своите документи пред да тргнат на пат.

Европската комисија, ЕИАОК и договарачот не се во позиција да влијаат на одлуките на националните власти во однос на визата.

Трошоците за издавање на виза ќе бидат покриени од DiscoverEU.

Ако за добивање на виза е задолжително да се има здравствено осигурување, тоа ќе биде обезбедено од договарачот. Поврзаните со тоа трошоци, ќе ги покрие DiscoverEU.

16. Осигурување

Сепак, европската картичка за здравствено осигурување или приватното здравствено осигурување може да не ги покриваат и опфаќаат сите можни случаи, особено ако е потребен повраток во земјата или одредена медицинска интервенција. Во тие случаи, се препорачува дополнително осигурување.

17. Изјава за одрекување од одговорност

Европската комисија, ЕИАОК и нивниот договарач ќе обезбедат само средства за патната пропусница, за Европската младинска картичка и по потреба за покривање на трошоците за виза како што е објаснето погоре. Оттука, трошоците за сместување, храна, осигурување, додатоците за патувањето или било кои други трошоци поврзани со патувањето се покриваат од самите избрани кандидати.

Европската комисија, ЕИАОК и нивниот договарач, нема да сносат одговорност за било каква штета која е предизвикана или претрпена од било кој избран кандидат на конкурсот, вклучувајќи и било каква штета нанесена кон трети лица или предизвикана од трети лица настаната како последица од или за време на примената на финансираните активности.

Европската комисија, ЕИАОК и нивниот договарач нема да бидат одговорни за било каква материјална, нематеријална или физичка штета претрпена од избраните кандидати или нивните придружници во текот на патувањето или за време на нивниот престој.

Посакуваното патување подлежи на ограничувања поврзани со буџетот, времето и достапноста на патни пропусници. Поради тоа, истото може да подлежи на промена, а надворешниот договарач назначен од Европската комисија и ЕИАОК не може да гарантираат дека посакуваното патување ќе се реализира.

Избраните кандидати се советуваат да обезбедат соодветно здравствено и патничко осигурување за текот на целото патување. Основното здравствено осигурување најчесто е обезбедено од националното здравствено осигурување на учесникот за време на неговото/нејзиното DiscoverEU патување преку европската картичка за здравствено осигурување. Сепак, европската картичка за здравствено осигурување или приватното здравствено осигурување може да не ги покриваат и опфаќаат сите можни случаи, особено ако е потребен повраток во земјата или одредена медицинска интервенција. Во тие случаи, се препорачува дополнително осигурување.

Европската комисија и ЕИАОК го задржуваат правото да ги изменат правилата поставени во точките 10 и 11 во случај на исклучителни околности.

18. Применливо право

Овој конкурс е регулиран според законите на ЕУ. Судот на правдата на Европската унија ќе има единствена надлежност во случај на спор помеѓу Унијата и било кој корисник во врска со интерпретацијата, примената или валидноста на правилата на овој натпревар, ако истиот не може да биде решен спогодбено.

19. Заштита на податоците

Бараните податоци ќе се користат само за избор на кандидати, овозможување на резервација на билети за патување и да им се обезбедат услуги поврзани со DiscoverEU, како што е циклусот за учење на DiscoverEU или промотивните кампањи на DiscoverEU. Учесникот може во овој случај да биде контактиран од Европската комисија и организациите овластени од Европската комисија, како и ЕИАОК, Националните агенции на програмата Еразмус+ и Еуродеск.

Сите лични податоци ќе бидат обработувани од Европската комисија и ЕИАОК во согласност со Регулативата (ЕУ) 2018/1725 на Европскиот парламент и на Советот од 23 октомври 2018 (со ставање вон сила на Регулативата (ЕК) бр. 45/2001) и согласно со „известувањата за постапките на обработка“ упатени до службеникот за заштита на податоци (СЗП) на Европската комисија (јавно достапни во регистарот на СЗП). Таквите податоци ќе бидат обработени од „раководителите на обработка на податоци“ на Европската комисија и ЕИАОК за целите на конкурсот, имплементацијата и следењето или заштитата на финансиските интереси на ЕУ.

Посебната изјава за приватност на Европскиот младински портал и соопштението за заштита на податоци на DiscoverEU објаснуваат на кој начин таа иницијатива ги користи личните податоци и на кој начин се штити приватноста на овие податоци.

Кандидатите имаат право да му се обратат во било кое време од Европскиот надзорник за заштита на податоци.

20. Жалби

Формулар за жалба ќе биде достапен на интернет страната на договарачот назначен од Европската комисија и ЕИАОК за организирање на резервациите за патувањата. Избраните кандидати/ки ќе бидат информирани за оваа можност при резервација на своите патувања.

¹Англискиот јазик преовладува над сите други преведени јазици.

DiscoverEU