Oiliúint agus tacaíocht le haghaidh rannpháirtithe

Cuireann an Cór Dlúthpháirtíochta Eorpach réimse seirbhísí tacaíochta ar fáil do rannpháirtithe agus d’eagraíochtaí rannpháirteacha, chun foghlaim, árachas agus gnéithe tábhachtacha eile a chinntiú. 

Ceapadh iad i gcomhréir le prionsabail an Chóir Dlúthpháirtíochta Eorpaigh. 

Cuidíonn siad freisin le hardleibhéal cáilíochta a choinneáil laistigh den Chór Dlúthpháirtíochta Eorpach agus cinntíonn siad go ndéantar gníomhaíochtaí a bhailíochtú ar an mbealach ceart.

Oiliúint ghinearálta ar líne

Oiliúint rochtana oscailte is ea an oiliúint ghinearálta ar líne do na hiarrthóirí agus na rannpháirtithe uile atá cláraithe, agus tá sí le fáil ar thairseach an Chóir Dlúthpháirtíochta Eorpaigh. I measc na modúl atá le fáil uirthi, tá:

• misean an Chóir Dlúthpháirtíochta Eorpaigh
• róil agus freagrachtaí na rannpháirtithe
• feasacht idirchultúrtha
• sláinte agus sábháilteacht
• agus go leor eile.

Tacaíocht teanga ar líne

Tá tacaíocht teanga ar líne (OLS) ceaptha chun cuidiú le rannpháirtithe feabhas a chur ar a n-eolas ar an teanga ina mbeidh siad ag obair. Tá OLS á óstáil ar ardán bainistíochta foghlama corparáidí an Choimisiúin Eorpaigh ar a dtugtar Acadamh an Aontais Eorpaigh.

Tá an tseirbhís le fáil i ngach ceann de theangacha oifigiúla an Aontais, is iad sin: Béarla, Bulgáiris, Cróitis, Danmhairgis, Eastóinis, Fionlainnis, Fraincis, Gaeilge, Gearmáinis, Gréigis, Iodáilis, Laitvis, Liotuáinis, Máltais, Ollainnis, Polainnis, Portaingéilis, Rómáinis, Seicis, Slóvaicis, Slóivéinis, Spáinnis, Sualainnis agus Ungáiris. Tá an tseirbhís foghlama teanga ar líne ar fáil freisin i mBascais, i nGailísis agus i gCatalóinis.

Nuair a bheidh rannpháirtí roghnaithe ag d'eagraíocht le haghaidh gníomhaíocht de chuid an Chóir Dlúthpháirtíochta Eorpaigh a mhairfidh 2 mhí nó níos mó, ba cheart di na sonraí logála isteach don OLS a sheoladh le ríomhphost chuig an rannpháirtí. 

Oiliúint

Tá an timthriall oiliúna agus meastóireachta ceaptha do rannpháirtithe agus d’eagraíochtaí rannpháirteacha araon.  

Tá rannpháirtithe a ghlacann páirt i ngníomhaíochtaí fadtéarmacha i dteideal na seisiún oiliúna seo a leanas a dhéanamh:

• oiliúint réamh-imeachta (le haghaidh gníomhaíochtaí trasteorann amháin) 
• oiliúint nuair a thosaíonn tú
• measúnú lár-thréimhse (le haghaidh gníomhaíochtaí a mhairfidh ar feadh 6 mhí nó níos mó amháin) 
• imeacht bliantúil de chuid an Chóir Dlúthpháirtíochta Eorpaigh

Bainfidh na heagraíochtaí rannpháirteacha tairbhe as na seisiúin oiliúna seo a leanas:

• oiliúint d’eagraíochtaí ar bronnadh an Lipéad Cáilíochta orthu le déanaí
• imeacht bliantúil d’eagraíochtaí a bhfuil an Lipéad Cáilíochta acu

Ba cheart a chinntiú leis an oiliúint go dtuigtear róil agus freagrachtaí na heagraíochta, go dtugtar eolas praiticiúil agus teicniúil maidir le bainistiú an tionscadail, go dtugtar eolas faoi ghnéithe tábhachtacha den Chór, go dtacaítear le heagraíochtaí tionscadail cháilíochtúla a fhorbairt agus go gcuirtear deiseanna líonraithe ar fáil.

Árachas

Ní mór do rannpháirtithe i ngníomhaíochtaí an Chóir Dlúthpháirtíochta Eorpaigh a bheith i dtimpeallacht shábháilte i gcónaí. 

Tá siad faoi árachas ar feadh fhad a ngníomhaíochta, ón uair a fhágann siad a dtír óstach go dtí deireadh an dara mí tar éis dóibh a ngníomhaíocht a chur i gcrích. 

Tá an méid seo a leanas ag rannpháirtithe i ngníomhaíochtaí trasteorann (gníomhaíochtaí a dhéantar i níos mó ná tír amháin):

• cumhdach comhlántach a chuireann an Coimisiún Eorpach ar fáil, i dteannta an Chárta Eorpaigh um Árachas Sláinte (EHIC) nó chóras sláinte náisiúnta na tíre óstaí 
• cumhdach príomhúil a chuireann an Coimisiún Eorpach ar fáil, mura féidir leis an rannpháirtí an Cárta Eorpach um Árachas Sláinte a bheith aige saor in aisce, nó mura bhfuil siad i dteideal cumhdach a fháil faoin gcreat rialála náisiúnta. 

Aon chostais a thabhaíonn rannpháirtithe i ngníomhaíochtaí a eagraítear ina dtír féin, aisíocfar iad mura bhfuil siad cumhdaithe ag an gcóras sláinte náisiúnta.

Ní mór don eagraíocht óstach a chinntiú go bhfuil Cárta Eorpach um Árachas Sláinte ag an rannpháirtí agus mura bhfuil sé indéanta sin a chinntiú, ní mór di a chinntiú go bhfuil an rannpháirtí cumhdaithe faoin bplean árachais éigeantach dá ndéanann an Cór foráil.

Le haghaidh tuilleadh eolais faoi chlúdach agus tacaíocht, chomh maith le treoracha maidir le hárachas a thógáil amach, féach suíomh gréasáin na cuideachta árachais.

Víosaí agus ceadanna cónaithe

D’fhéadfadh víosa a bheith ag teastáil ó rannpháirtithe chun am a chaitheamh thar lear sa tír chomhpháirtíochta ina bhfuil a ngníomhaíocht á hóstáil, nó chun taisteal ar aghaidh ón tír sin. 

Moltar go láidir do rannpháirtithe iarratas a dhéanamh ar víosa i bhfad roimh ré, toisc go bhféadfadh sé roinnt seachtainí a thógáil sula n-eiseofar é. 

Chun tuilleadh cabhrach nó comhairle a fháil maidir le hábhair amhail víosaí, ceadanna cónaithe agus slándáil shóisialta, déan teagmháil le do Ghníomhaireacht Náisiúnta agus/nó leis an nGníomhaireacht Feidhmiúcháin.  

Is foinse mhaith eolais ghinearálta í tairseach inimirce an Aontais faoi víosaí gearrthéarmacha agus fadtéarmacha agus ceadanna cónaithe araon. 

Comhaontuithe le rannpháirtithe

Sula dtéann siad thar lear, ní mór do gach duine atá rannpháirteach i ngníomhaíocht aonair i réimse na hoibre deonaí a dtacaíonn an Cór Dlúthpháirtíochta Eorpach léi comhaontú rannpháirtí a shíniú. Ní mór na gnéithe seo a leanas ar a laghad den ghníomhaíocht a shainiú leis sin:

• Cearta agus freagrachtaí maidir le ranníocaíocht árachais agus airgeadais a chuireann an Cór ar fáil 
• Na cúraimí atá le déanamh le linn na gníomhaíochta
• Na torthaí foghlama a bhfuiltear ag súil leo.

Meantóireacht

Ba cheart tacaíocht phearsanta a thabhairt do rannpháirtithe trí mheantóireacht le linn a ngníomhaíochta. Is féidir leis sin cabhrú leo imeascadh, in eagraíocht atá nua dóibh, agus, má tá siad ag obair go deonach nó ag obair thar lear, i dtír eile freisin.

Youthpass

Tá Youthpass ar fáil do gach rannpháirtí de chuid an Chóir. Uirlis is ea í a chuidíonn leat na torthaí foghlama a d’fhorbair tú le linn an tionscadail a aithint agus a dhoiciméadú. Leis an uirlis sin, féadfaidh siad cur síos a dhéanamh ar an méid a rinne siad agus an méid a d’fhoghlaim siad a chur in iúl – scileanna neamhfhoirmiúla agus seachfhoirmiúla san áireamh. Tá sin go léir leagtha amach go foirmiúil i ndeimhniú Youthpass. Go dtí seo, bhain breis agus 1 mhilliún duine úsáid as an scéim agus bronnadh an deimhniú orthu.  

Ag brath ar an gcineál aitheantais a theastaíonn uait, nuair a chruthaítear deimhniú Youthpass cuidíonn sé leat machnamh a dhéanamh ar do Curriculum Vitae (CV) féin agus ceann a chruthú in Europass. 

Tá ról ag eagraíochtaí rannpháirteacha chun cuidiú le rannpháirtithe machnamh a dhéanamh ar a bhfuil foghlamtha acu agus a dtorthaí foghlama a dhoiciméadú le cabhair ó Youthpass nó ó uirlisí bailíochtaithe de chuid an Aontais nó uirlisí bailíochtaithe náisiúnta eile.

Deimhniú rannpháirtíochta

Deimhnítear leis sin rannpháirtíocht i ngníomhaíochtaí an Chóir Dlúthpháirtíochta Eorpaigh. Tar éis dóibh an ghníomhaíocht atá beartaithe agus an suirbhé ar a dtaithí a chur i gcrích, tá rannpháirtithe i dteideal deimhniú a fháil ar thairseach an Chóir Dlúthpháirtíochta Eorpaigh ó cheann de na heagraíochtaí atá rannpháirteach.